Ramiz Mehdiyevin dövlət çevrilişi ssenarisinin əsas tərəf müqabillərindən biri olan Əli Kərimlinin həbsi ilə ətrafındakı trollar reallığı qəbul etmək əvəzinə daha da azğınlaşıblar.

Bu "ÇETE"nin əleyhinə danışan istənilən şəxsi sosial platformalarda linç etməyə çalışır, həqiqətlərin cəmiyyətə çatdırılmasına bu üsulla mane olmağa çalışırlar. Siyasətçilər, media rəhbərləri, jurnalistlər, ictimai aktivlər hədəfə götürülür.

Lakin ölkənin "söyüş dəstəsi" anlamır ki, siyasi mübarizə təhqirlə aparılmır. Əli Kərimli haqqında danışan bir kimsə onu təhqir etmir, sadəcə, Ramiz Mehdiyevlə onu birləşdirən əməllərdən, onların uzun illər davam edən əlaqələrindən danışır.

Faktı qəbul etmək istəməyən trollar isə həqiqəti dinləmək əvəzinə bu arqumentlərə qarşı təhqirlə cavab verirlər.

Mövzu ilə bağlı danışan Gələcək Azərbaycan Partiyasının sədri Ağasif Şakiroğlu “Cebheinfo.az”-a açıqlamasında bildirib:

“Ölkə xaricində “söyüş müxalifəti” mövcud olduğu kimi, AXCP sədri Əli Kərimli də Azərbaycan daxilində “söyüş müxalifət”inin simvoludur”.

O bildirib ki, bəzi AXCP funkionerlərinin gizli qruplarda təlimatları ilə səsyazıları da yayılıb:

“Normal siyasi mübarizə apara bilməyənlər, öz iddialarını faktlarla sübut etməyi bacarmayanlar təhqirə yol verirlər. Onlar tərəfini tutduqları şəxslərin qanunsuz əməlləri barədə ortaya fakt qoyulmasına qıcıq olurlar. Belə trollar öz əxlaqlarına, ailə kodekslərinə və tərbiyələrinə uyğun mövqe sərgiləyirlər. Hətta deyərdim ki, öz sədrlərinin əxlaqına uyğun davranırlar”.

Siyasətçi qeyd edib ki, sosial şəbəkələrlə bağlı qanun qüvvəyə mindikdən sonra bu tip saxta profillərin bağlanması prosesi gedəcək:

“Həmin vaxt gerçəklər üzə çıxacaq. Reallıq budur ki, şərh yazanların 90 faizinin profilləri saxtadır. İstənilən adam çox rahatlıqla bunu analiz edə bilər. Profilində öz fotosu olmayan, real adından istifadə etməyən insanların təhqir rəyləri yazdığını görürük. Haqqında heç bir məlumat göstərməyən şəxslər sosial şəbəkələrdə profillər açırlar. Yəni şəxsiyyəti məlum olmayan şəxsin siyasi mövqeyi var. Bütün bunlar həmin profillərin “fake” olduğunu göstərir. Bir nəfər onlarla belə saxta profil idarə edir. AXCP bu metodu seçib”.

Partiya sədri qeyd edib ki, AXCP-də kimsə 30 ildir apardıqları siyasətin nəticəsiz olmasının səbəbləri barədə düşünmür:

“Əminəm ki, qısa bir müddət sonra onların destruktiv fəaliyyəti də iflasa uğrayacaq. Bütün bu neqativ hallar sosial şəbəkələr haqqında qanun qüvvəyə mindikdən sonra aradan qalxacaq. Əli Kərimli də Azərbaycan tarixinin tullantılar sırasında olacaq”.

Ağasif Şakiroğlu özünün də tez-tez belə söyüş rəylərinə məruz qaldığını, ancaq hüquqi addım atmadığını deyib:

“Əslində, cəsarətli adam barəsində addım atarlar. Kimsə saxta profillərin arxasında gizlənərək siyasi mövqe ortaya qoyursa, ona qarşı addım atmağa dəyməz. Faktiki real olmayan adama görə həmlə etmərəm.

Mən Əli Kərimlinin trollarının hücumlarına alışmışam. Əli Kərimlinin əxlaqına çox yaxşı bələdəm. Onu çox yaxşı tanıyıram. Yəni belə addımlar mənim üçün sürpriz deyil. Real profildən tənqid və ya təhqirdən asılı olmayaraq, rəy yazılanda mütləq cavab verirəm. Sözdə deyil, həqiqətdə demokrat olan şəxs hər cür psixoloji durumu olan adamlara öyrəşməlidir”.

Lakin siyasətçinin sözlərinə görə, partiyası bu aspektdə addım atmağa hazırlaşır:

“Mən “it hürər, karvan keçər” prinsipindən çıxış edirəm. Ona görə də indiyə kimi mənə təhqir yazanlarla bağlı hüquqi addım atmamışam, atmağı da düşünmürəm. Ancaq Gələcək Azərbaycan Partiyasının hüquqşünasları sosial şəbəkələrdə mənim və partiyamız barəmdə əxlaqsız şərhlər yazanlar barədə hüquqi addımlar atmaq üçün materialları toplayırlar.

Yəqin ki, yaxın zamanda DİN-nin Kibercinayətkarlıqla Mübarizə Baş İdarəsinə müraciət olunacaq. Bu, mənim tərəfimdən verilən tapşırıq deyil, Hüquq deportamentinin üzərinə düşən vəzifədir”.