Rusiya Xarici İşlər Nazirliyi açıqlama yayaraq AZAL-a məxsus təyyarənin vurulması zamanı xəsarət almış sərnişinlərə və ölənlərin yaxınlarına ümumilikdə 358,4 milyon rubl sığorta ödənişi edildiyini iddia edib. Bildirilib ki, guya reysdə olan 62 sərnişindən 46-nın xəsarət alması və həlak olması ilə bağlı iddialar tam təmin edilib. O cümlədən 15 Rusiya vətəndaşından 7-nin, 38 Azərbaycan vətəndaşından 35-nin, 3-ü Qırğızıstanın, 6 Qazaxıstan vətəndaşından isə 1-nin ödənişi tam təmin edilib. Qeyd olunub ki, xəsarət alanlar və ölənlərin yaxınları ilə tam həlli üçün təzminat məbləğlərinin razılaşdırılması istiqamətində işlər davam edir. Azərbaycan XİN-dən bu açıqlamaya sərt reaksiya gəlib. Xarici İşlər Nazirliyinin Mətbuat xidməti idarəsinin rəisi Ayxan Hacızadə deyib ki, Rusiya XİN ictimaiyyəti çaşdırır. Vurğulanıb ki, AZAL-a və sərnişinlərə Rusiyada qeydiyyatda olan sığorta şirkəti tərəfindən sığorta ödənişlərinin həyata keçirilməsi və təyyarənin vurulması ilə bağlı ölkəmizin Rusiya Hökumətindən kompensasiya tələb etməsi məsələləri tamamilə fərqli mövzulardır: "Sözügedən şirkət tərəfindən qeyd edilən sığorta ödənişlərinin həyata keçirilməsi prosesi artıq 6 aydır həyata keçirilir. Ümumilikdə, bu ödənişlər məhz AZAL-ın sığorta müqaviləsi çərçivəsində, şirkətin təyyarəsini və sərnişinləri sığorta etməsi nəticəsində öhdəliklərə uyğun olaraq təmin edilir. Ödənişlərin məhz Rusiya sığorta şirkəti tərəfindən həyata keçirilməsi məsələsinə gəldikdə qeyd edək ki, adətən təyyarələrin sığortası müvafiq beynəlxalq sığorta şirkətləri vasitəsilə həyata keçirilir. Rusiyanın ərazisində heç bir beynəlxalq sığorta şirkətinin fəaliyyət göstərmədiyini nəzərə alaraq, AZAL təyyarəsinin sığortası Rusiya şirkəti vasitəsilə aparılıb. Beləliklə, sığorta ödənişlərinin Azərbaycanın Rusiya hökumətindən tələb etdiyi kompensasiya ilə eyniləşdirilməsi cəhdləri düzgün deyil".

Ümumən, Moskvanın Azərbaycanda 13 rus vətəndaşının həbs olunmasının Azərbaycan-Rusiya münasibətlərinin pisləşməsi səbəbi kimi təqdim etməsi və onların azadlığa buraxılmasının münasibətlərin yaxşılaşması üçün şərt kimi irəli sürməsi yanlışdır. Azərbaycan-Rusiya münasibətlərinin gərginləşməsinə məhz AZAL təyyarəsinin vurulması nəticəsində qəzaya uğraması və bundan sonra Rusiya rəsmiləri tərəfindən göstərilən davranışın səbəb olduğu məlumdur. Bununla yanaşı, Rusiyada etnik mənsubiyyətə görə azərbaycanlıların təqib olunması, Yekaterinburq şəhərində azərbaycanlıların döyülərək qətlə yetirilməsi münasibətlərdə əlavə gərginlik yaradıb. Bununla yanaşı, Rusiyanın müxtəlif dövlət qurumlarının Azərbaycana qarşı fəaliyyəti münasibətlərə mənfi təsir edən amillər sırasındadır.

. "Rusiya indi bu vəziyyətdədir. Hazırda ölkədə yaşamağın mümkünsüzlüyünü görən xeyli elm xadimi, siyasətçi, müxtəlif sənət sahibləri Rusiyanı tərk ediblər. Moskva Rusiyada yaşayan millətlərə nifrət siyasəti üzərindən nəyəsə nail ola bilməz. Rusiya və Azərbaycan arasında münasibətlərin normallaşması üçün atılacaq addımlar hamıya, o cümlədən Prezident V.Putinə də bəllidir. Qəribədir ki, Rusiya Azərbaycandan nəsə gözləyir. Halbuki, ilk addımları haqlı olaraq Rusiyadan gözləyirik. 2022-ci ildə Rusiya ilə Azərbaycan arasında strateji müttəfiqlik sənədi imzalanıb və həmin müqavilənin bütün bəndlərinə Azərbaycan sonadək riayət edib. Azərbaycan lideri hər zaman öz imzasının, sözünün arxasındadır. Təəssüflər ki, Rusiya ilə bağlı bunu demək mümkün deyil. Rusiya ilə müqavilə imzalamaq "suya yazı yazmaq" kimidir. İndiki gərgin münasibətlərin yaranmasının başlıca səbəbkarı Rusiyanın yeritdiyi qərəzli siyasət, atdığı addımlardır. Günahkar tərəf özü geriyə çəkilməli, münasibətləri normallaşdırmaq istiqamətində üzərinə düşəni etməlidir".

"Hələ də cinayətkarlar aşkarlanaraq cəzalanmayıb. Bu yanaşma beynəlxalq konvensiyalara ziddir. Ən əsası isə son aylarda Rusiyada yaşayan, işləyən azərbaycanlılara qarşı ciddi təzyiqlər edilir, əsassız yerə incidilirlər, həbs olunurlar, biznesləri əllərindən alınır. Diaspor fəallarının əmlakları müsadirə edilir, ölkədən deport olunurlar. Başlarına min cür oyun açılır. Moskva dünyada misli görünməmiş rəzilliyə əl atır. Bütün bunların fonunda Rusiyanın Azərbaycandan nə gözləntisi ola bilər?! Əgər Rusiya sivil dünyanın tərkib hissəsi olduğunu, normal ölkə olduğunu iddia edirsə, beynəlxalq qayda-qanunlara uymalıdır. Ən azından elemantar insan haqlarına riayət etməlidir. Rusiya uğursuz siyasətinə görə dünyada faktiki olaraq təklənmiş durumdadır. Ağır sanksiyalara məruz qaldığı üçün ciddi maddi itkilərlə üzləşib. Qərb ölkələrindəki banklarda 300 milyard dollarlıq vəsaitlərinə əl qoyulub".

A.Əlizadə əlavə edib ki, kifayət qədər böyük sərvətlərə, resurslara, geniş əraziyə malik olsa da, təəssüf ki, Rusiyanın bütün potensialı tamamilə lazımsız istiqamətə xərclənib:

"Hədəf hərbi sənaye olduğuna görə, Rusiya digər sahələrdə Qərb ölkələrindən, Çindən geri qalıb. Halbuki, bu qədər zəngin resurslarla Rusiya dünyanın ən inkişaf etmiş, rifah səviyyəsi yüksək olan və təhlükəsiz ölkəsi ola bilərdi. Ancaq Rusiya bu siyasəti ilə öz-özünü çətin, çıxılmaz duruma salıb. Bölgə və dünya üçün bəlaya çevrilib. Kreml rəhbərinin həyata keçirdiyi siyasət Rusiyanı uçuruma aparır".

"Əslində, hamını maraqlandıran sual odur ki, niyə görə müharibə şəraitində olan, Qərb ölkələri ilə üz-üzə dayanan, sanksiyalara məruz qalan Rusiya ən azından öz qonşuları ilə normal münasibət saxlamır, əksinə, əlaqələri daha da pisləşdirir?! Çünki Rusiya şovinizm əhvali-ruhiyyəsindən, imperialist təfəkkürdən qətiyyən əl çəkə bilmir. Rusiyanın hər kəsdən, hər dövlətdən üstün olduğunu düşünürlər. Postsovet ölkələrinin müstəqil siyasət yürütməsini qəbul etməkdə çətinlik çəkirlər. Azərbaycan müstəqil xarici siyasət həyata keçirir. Həm region ölkələri, həm Qərb dövlətləri, ərəb dünyası ilə əlaqələri genişləndirir, eyni zamanda Çin və s. ölkələrlə çoxvektorlu münasibətləri inkişaf etdirir. Həmçinin, Ukraynaya humanitar yardım göstəririk, Rusiyanın işğalçılıq siyasətini qəbul etmirik, dəstəkləmirik. Rəsmi Bakının mövqeyi odur ki, ərazi bütövlüyü, dövlətlərin sərhədləri, suverenliyi toxunulmazdır. Rusiya bu reallıqları qəbul edərək qonşularla, Azərbaycanla bərabər hüquqlu münasibət saxlamalıdır".