Sumqayıt Şəhər Məhkəməsində qəsdən sağlamlığa yüngül zərər vurmada təqsirləndirilən Elmar Tahirovun (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Günel İsmayılovanın sədrliyi ilə keçirilən prosesdə hökm oxunub.

Məhkəmənin hökmü ilə o, 6 ay müddətinə azadlığın məhdudlaşdırılması (elektron qolbaq) cəzasına məhkum edilib.

İttihama görə, hadisə 18 mart 2025-ci il tarixdə, saat 21 radələrində Sumqayıt şəhəri ərazisində qeydə alınıb.

Belə ki, Elmar Tahirov məhəllədə qeyri-rəsmi münasibətdə olduğu qadın ilə sonuncunun keçmiş həyat yoldaşı, zərərçəkmiş Cəmil İslamov (adı, soyadı şərtidir) arasında baş vermiş narazılığa müdaxilə edib. Bu zaman o, zərərçəkmiş ilə mübahisə edib. Nəticədə Elmar Cəmilin üz və bədən nahiyəsinə yumruqla qəsdən bir neçə dəfə zərbə vuraraq onun sağlamlığına yüngül zərər yetirib.

Hadisədən sonra Elmar Tahirov saxlanılaraq cinayət məsuliyyətinə cəlb edilib.

Məhkəmədə ifadə verən Cəmil İslamov ona dəymiş ziyanın ödənilməsi ilə bağlı razılıq olmadığını, təqsirləndirilən şəxsdən şikayətçi olduğunu və ona dəymiş ziyanın ödənilməsi ilə bağlı qərar qəbul edilməsini xahiş edib.

Elmar Tahirov isə məhkəmədə dindirilərkən özünü təqsirli bilmədiyini deyib. O, hazırda rəsmi evli olsa da, uzun müddətdir ki, faktiki olaraq ailəsi ilə birlikdə yaşamadığını, döydüyü şəxsin eks-həyat yoldaşı ilə sevgili olduğunu etiraf edib.