Rusiyada növbəti dəfə Azərbaycan əleyhinə təxribat xarakterli ifadələr səsləndirilib.
Bu dəfə də Kremlin ən məşhur təbliğatçılarından biri, aparıcı Vladimir Solovyov ölkəmizi hədəf alıb. O, öz verilişində politoloq Sergey Markovu “Azərbaycan agenti” adlandırıb.
Onun sözlərinə görə, Markovun maliyyə mənbələri araşdırılmalı, barəsində cinayət işi açılmalı və həbs olunmalıdır:
“Orada birini, azərbaycanlını ifşa etdilər, amma hələ həbs etmək lazımdır. Orada hansı pulların gəldiyini yoxlamaq, həbsə atmaq lazımdır. Bütün təsir agentləri sona qədər məhv edilməlidir”.
Qeyd edək ki, Sergey Markov Azərbaycana münasibətdə obyektiv mövqe sərgiləməsi səbəbindən Rusiyada “xarici agentlər” reyestrinə salınıb. Görünür, ədaləti demək və Şuşa Qlobal Media Forumunda iştirak etmək Kremldə birmənalı qarşılanmayıb. Beləliklə, Rusiya öz içində də həqiqəti deyənləri hədəfə alıb.
Çünki Markov da o həqiqəti deyənlərdən biridir. Buna baxmayaraq, bütün gün yalan danışan Solovyov kimilərə isə meydan verilir. Əlbəttə ki, bu da Kremlin növbəti səhvlərindən biri kimi qiymətləndirilir.
Mövzu ilə bağlı “Cebheinfo.az”-a açıqlama verən politoloq Qulamhüseyn Əlibəyli bildirib ki, Rusiyada ədalətin və obyetivliyin tərəfdarı olan insanlara qarşı kampaniya başladılıb:
“Rusiyada hər şeyi olduğu kimi görən ekspertlər var. Onlardan biri də Sergey Makrovdur. Onun kimi ekspertlər Rusiyanın Azərbaycan və Ermənistanla arasındakı münasibətlər barədə obyektiv həqiqəti deyirlər. Lakin bu, Kremlin xoşuna gəlmir. Ona görə də bunu Moskva hakimiyyətinin ölkəmizə qarşı növbəti hücumları kimi dəyərləndirmək lazımdır. Artıq Rusiya müxtəlif bəhanələrlə Azərbaycana təzyiq göstərməyə çalışır”.
Ekspert diqqətə çatdırıb ki, Kreml Mixail Qusman və Sergey Makrov kimi haqqı deyən ekspertləri cəzalandırmağa çalışır:
“İndi də vaxtilə Azərbaycanla bağlı məsələdə obyektiv həqiqəti müdafiə edən şəxsləri “xarici agent” adlandırırlar. Bu, Rusiya siyasətinin çox iyrənc formasının təzahürüdür. Hesab edirəm ki, Kremlin bu xoşagəlməz addımları davam edəcək.
Yaxın zamanlarda başqa şəxslərə qarşı da bənzər addımlar atıla bilər. Əslində, Azərbaycanın müstəqil siyasət yürütməsi və Zəngəzur dəhlizinin açılacaq olmasını Rusiya qəbul edə bilmir. Ona görə də gələcəkdə də hər cür təxribat gözləmək olar”.
