“Dünya sanki yanır, onun alovlarının hər yerə sıçıramaq təhlükəsi var. Məsələn, Yaxın Şərqdə müharibə gedir, Avropada Ukraynaya qarşı savaş davam edir. Bir müddət əvvəl İrana qarşı hərbi əməliyyat keçirildi, İsrail qırıcıları bu ölkəni bombaladı. Amerika isə İranın nüvə texnologiyalarının yerləşdiyi obyektləri hədəfə aldı. Eyni zamanda Ukrayna Xəzər dənizində Rusiyaya məxsus gəmini vurdu. Bütün bunlar göstərir ki, heç bir ölkə müharibədən sığortalanmayıb. Bu baxımdan Azərbaycan prezidenti İlham Əliyevin Kəlbəcərdəki açıqlamaları xüsusi əhəmiyyətə malikdir”.

Bunu “Reytinq” qəzetinə açıqlamasında hərbi ekspert Azad İsazadə Azərbaycan prezidenti İlham Əliyevin dünən Kəlbəcərdə verdiyi bəyanatını şərh edərkən deyib.

Prezidentin bəyanatının hərbi tərəfinə diqqət çəkən ekspert qeyd edib ki, Azərbaycan müharibəyə hazır olmalıdır, çünki dünya gərgin bir mərhələdən keçir: “İndi bütün ölkələr özünə müttəfiq axtarır və hərbi imkanlarını gücləndirir. Pis-yaxşı ABŞ və Avropa bir yerdədir. Digər tərəfdə Çin, Rusiya, Şimali Koreya və İran kimi dövlətlər dayanır. Sonuncuların hərbi ittifaqı olmasa da, ümumi mövqeləri oxşardı. Sabah bunlar arasında müharibə başlasa, digər ölkələr məcbur olub tərəf seçməlidir. O cümlədən Azərbaycan və Türkiyə”.

A. İsazadə xatırladıb ki, II Dünya müharibəsi zamanı da bir sıra dövlətlər tərəf seçmək məcburiyyəti ilə üzləşmişdilər.

Müsahibimiz əlavə edib ki, Azərbaycan üçün vacib sayılan problem həllini tapıb: “Ərazi bütövlüyümüzü təmin edərək işğalçı ordunu ərazimizdən qovmuşuq. İndi bizə müharibə lazım deyil. Amma “Sülh istəyirsənsə, müharibəyə hazır ol”,- prinsipi də var. Bizim heç bir qonşumuzla savaşmaq niyyətimiz olmasa da, böyük müharibələrdə neytral qalmaq üçün güclü ordumuz və müttəfiqlərimiz olmalıdır. Yəni gərgin dövrlərdə ordumuz güc nümayiş etdirir, imkanlarımızı göstəririk və deyirik ki, bizdən uzaq durun, gedin, probleminizi başqa məkanlarda həll edin! Bizim üçün uyğun olmayan problem müttəfiqlərimiz Türkiyə və İsrail arasındakı gərginlikdir. Ümid edirəm ki, bu məsələ də tədricən həllini tapacaq”.

A. İsazadənin fikrincə, Ali Baş Komandanın Xəzərdə gücümüzü artırmağımızla bağlı dedikləri təsadüfi deyil: “Nəzərə almaq lazımdır ki, dünyada bütün ölkələrin ən zəif yeri dənizdir. Çünki dənizdən vurmaq asandır. Bizim isə enerji layihələrimiz əsasən Xəzər dənizi ilə bağlıdır. Odur ki, dənizdə donanmamızın gücləndirilməsi çox vacibdir. Həm də bilməliyik ki, Ermənistan nə qədər çabalasa da, Azərbaycan üçün hərbi təhdid yarada bilməz, belə bir imkan və gücə malik də deyil. Deməli, bizim üçün təhdid ya Xəzərdən, ya da havadan ola bilər”.

Hərbi ekspert deyib ki, Azərbaycan Xəzər dənizində güclənməkdə davam edir və səmadan da raket zərbələrinə qarşı güclü olmalıyıq:

“Bəli, bu gün bizim imkanımız var ki, ilk raket hücumunu dəf edək və cavab verək. Amma sonrakı mərhələlərdə necə olacaq, bunu ancaq hərbi imkanlarımızdan məlumatı olan şəxslər bilir”.

İsazadə düşünür ki, sadaladığı bu məsələlər diqqət mərkəzindədir və mürəkkəb kombinasiyalı hava müdafiə sistemləri qurulur, əldə olanlar təkmilləşdirilir: “Nəzərə almaq lazımdır ki, İsrail kimi ciddi hava müdafiə sistemi olan ölkələrdə də raketlər bəzən müdafiəni keçə bilirdi. Quru müharibələrə gəldikdə, Azərbaycan Ordusu istənilən istiqamətdən olacaq hücumun önünü kəsmək, əks-zərbə endirmək imkanına malikdir. Bu məsələdə ciddi problem görmürəm”.

İsazadə sonda əlavə edib ki, xüsusi təyinatlı qüvvələrimizin sayı artırılıb və ordumuz istənilən istiqamətdə təhlükənin qarşısını almağa hazırdır. Yəni Azərbaycan müharibə arzulamasa da, müharibəyə hazır olmalıdır.