İtaliyada qəbul olunan qanun dünyaya səs salıb. Baş nazir Giorgia Meloni hökumətinin hazırladığı və qadın cinayətlərinə görə ömürlük həbs cəzası nəzərdə tutan layihə parlamentin yuxarı palatası olan Senatda yekdilliklə qəbul edilib. Bildirilib ki, son dövrlərdə qadınlara qarşı zorakılıq hallarının artması və ötən il baş vermiş 113 qadın qətli hökuməti hərəkətə keçməyə vadar edib. Sözügedən qanun, həmçinin Azərbaycanda da müzakirələrə səbəb olub. Əksəriyyət ölkəmizdə oxşar durumun müşahidə edildiyini, bu istiqamətdə qanunvericilikdə dəyişikliyin vacibliyini iddia edib.

Bu təklifin gündəmə gəlməsi mümkündürmü?

Globalinfo.az-a danışan deputat Fazil Mustafa deyib ki, Azərbaycanda bu cür tədbirlərin tətbiq olunması mümkündür:

“Çünki ölkəmizdə bəzi hallarda qadınların cinsiyyətinə görə öldürülməsi halları müşahidə olunur. Onların şiddətdən qorunması və qətllərin qarşısının alınması üçün belə addımların atılması vacibdir. Azərbaycanda bu istiqamətdə müəyyən problemlər hələ də mövcuddur. Maarifləndirmə işləri aparılmasına, inzibati, hüquqi tədbirlərin görülməsinə baxmayaraq, bəzi boşluqlar var. Bu baxımdan, qanunvericiliyin sərtləşdirilməsi və daha ciddi tədbirlərin görülməsi faydalı ola bilər. Bu, həm qadınların hüquqlarının qorunmasına, həm də cəmiyyətdə daha güclü bir hüquqi təhlükəsizlik mühiti yaradılmasına xidmət edər”.

Hüquqşünas Ramil Süleymanov qadınların həssas qrup olduğunu və onlara qarşı törədilən bu tip cinayətləri qəbul etmədiyini vurğulayıb:

“Bu istiqamətdə ciddi maarifləndirmə işi aparılmalıdır. Bu, insanları belə cinayətlərin ciddiliyi və onların nəticələrini başa düşməyə yönəltməli, həmçinin qadınların hüquqlarını qorumağa xidmət etməlidir. Bundan əlavə, Cinayət Məcəlləsində törədilmiş cinayətlərin və bu cür əməlin ağırlaşdırıcı halları ətraflı şəkildə təsvir olunub. Bunlardan biri köməksiz vəziyyətdə olan bir şəxsin öldürülməsi və ya ona qarşı cinayət törədilməsi, eləcə də cinsi, irqi və dini zəmində ayrı-seçkilik əsasında cinayətin törədilməsidir. Bu halların Cinayət Məcəlləsində nəzərə alınması cəmiyyətə mübarizənin əhəmiyyətini göstərir. Həm hüquqi, həm də sosial səviyyədə bu cür cinayətlərin qarşısını almaq üçün daha sərt qanunlar və maarifləndirmə tədbirləri təşkil olunmalıdır”.

Vəkil əlavə edib ki, Cinayət Məcəlləsinin 120-ci maddəsi qəsdən adam öldürmə cinayətini tənzimləyir:

“Bu cinayəti törədən şəxslər üçün 9 ildən 14 ilə qədər azadlıqdan məhrumetmə cəzası tətbiq oluna bilər. Eyni zamanda, ağırlaşdırıcı hallar nəzərə alındıqda, cinayətin ağırlıq dərəcəsinə görə cəzanın daha da sərtləşdirilməsi mümkündür. Belə hallarda, 14 ildən 20 ilə qədər azadlıqdan məhrumetmə cəzası və ya cinayət əməlinin xüsusiyyətinə görə ömürlük həbs cəzası verilə bilər”.