Bunu Qaynarinfo-ya açıqlamaasında Ədalət Partiyasının sədri Mütəllim Rəhimov deyib. Sədr bunun səbəbini mərhum İlyas İsmayılovun yoxluğu ilə əlaqələndirib:

"Həm qurultayı mərhum sədrimiz İlyas İsmayılovsuz keçırməli olduq, həm də fəaliyyətə onsuz başlamaq məcburiyyətində qaldıq. Bu isə daha çox əmək, vaxt, iradə və enerji tələb edirdi. İndiyədək fəaliyyətimizi nizamnamə əsasında tənzimləyə bilmişik. Partiyanın rəhbər strukturlarının təşkil olunması prosesini başa catdırmaqdayıq. Eyni zamanda rayon təşkilatının fəaliyyətinə yenidən baxırıq, mövcud çatışmazlıqları aradan qaldırmağa çalışırıq. Təşkilati baxımdan güclü bir partiya ortaya qoymaq əzmindəyik. Eyni zamanda Ali Məclisin iclasına hazırlaşırıq. Ali Məclisin iclasını keçirməklə rəhbər strukturların formalaşmasını başa catdıracağıq”.

Mütəllim Rəhimov bildirib ki, bütün bunlarla yanaşı, Ədalət Partiyası ölkəmizin ictimai-siyasi həyatında fəal iştirak edir:

"Həyatımız hər gün dəyişir, yenilənir. Buna görə də, şübhəsiz ki, fəaliyyətiniz də ona uyğun olaraq qurulur. Çalışırıq ki, İlyas İsmayılovun siyasi xəttini davam etdirərək, ölkəmizin siyasi həyatında fərqli və özünəməxsus rolumuzu qoruyub saxlayaq”.

Xatırladaq ki, Ədalət Partiyasının sədri İlyas İsmayılov bu ilin fevral ayında dünyasını dəyişib.