Bir müddətdir ki, paytaxtda dayanacaqlarda fəaliyyət göstərən “BakıKart” terminallarında metal pul vasitələrindən istifadə etmək mümkün deyil.

Belə ki, həmin aparatların metal pul qəbul edən hissənin üzəri müxtəlif vasitələrlə bağlanılıb. Bu amil isə sakinləri çətin vəziyyətə salır.

Belə ki, işə tələsən vətəndaşlar həmin aparatdan pul yükləmək istəsələr də terminallar yalnız kağız pul qəbul etdiyindən problemlə üzləşirlər.

Əgər vətəndaşın cibində kağız pul yoxdursa, demək o heç yerı gedə bilməyəcək. Artıq müəyyən müddətdir ki, davam edən bu problem nə vaxt həllini tapacaq?

Məsələ ilə bağlı “BakıKart”-ın yaydığı məlumata görə, hazırda bütün metro stansiyalarında “BakıKart” terminalları fasiləsiz fəaliyyət göstərir və sərnişinlərə balans artırmaq üçün həm kağız pul, həm də metal pul vasitələrindən istifadə imkanı təqdim olunur:

“Metal pul qəbul etməyən bəzi terminallar yalnız texniki nasazlıqlar səbəbindən bu funksiyanı müvəqqəti olaraq dəstəkləmir.

Lakin bu məntəqələrdə vətəndaşların çətinlik yaşamaması üçün həmin terminalların yanında metal pul qəbul edən əlavə terminallar mövcuddur və tam funksionalı dəstəkləyir. Mövcud texniki nasazlıqların aradan qaldırılması məqsədilə, “K Group” MMC terminal istehsalçısı ilə əlaqə saxlamış və istehsalçı tərəfindən mühəndis ezam olunub”.

“BakıKart”dan “Cebheinfo.az”-a bildirilib ki, paytaxtda bəzi terminallarda belə hal mövcuddur:

“Nə vaxt fəaliyyətinin tam bəpa olunacağı ilə bağlı dəqiq vaxtı deyə bilmərik. Bu istiqamətdə lazımi işlər aparılır. Yaxın vaxtda problem aradan qaldırılacaq. Ümumi neçə aparatda belə problem yaranmasına gəldikdə, bunu deyə bilməyəcəyik”.

Qeyd edək ki, vəziyyət heç də “BakıKart”ın məlumatında qeyd etdiyi kimi deyil. Məsələn, Səbail rayonu 20-ci sahədə yerləşən ərazidəki dayancaqda 2 “BakıKart” terminalı var ki, həmin terminallar da metal pul qəbul etmir.

Eyni zamanda, həmin terminalların yanında heç bir əlavə terminal mövcud deyil. Belə olduğu təqdirdə vətəndaşların vəziyyətdən necə çıxacağı isə sual doğurur.