Mingəçevirdən olan iş adamları Nicat Həsənov və Rəşad Şirinov "Azərişıq” ASC-nin sədri Baba Rzayevin qardaşından Prezident İlham Əliyevə və energetika naziri Pərviz Şahbazova müraciət edib.
"Cumhuriyyet.az" xəbər verir ki, iş adamları Mingəçevir İES tikintisi zamanı hüquqlarını pozulduğunu və onlara ödəniləcək məbləğin indiyə qədər çatmadığını bildiriblər.
"Cənab Prezident, bizə kömək edin"
N.Həsənov və R.Şirinov deyir ki, şəxsən P.Şahbazovun 2018-ci ildəki səfəri zamanı Mingəçevir İES-in tikintisinin boya işlərini yerinə yetiriblər: "Amma həmin o boya işlərinin ödənişi hələ də yerinə yetirilməyib. Gördüyüm işlərin hamısının sübutunu şəkil və videolar ilə sizə təqdim etməyə hazıram. Mənim babam Nağı Qəhrəmanov və dayım Çapay Qəhrəmanov hər zaman vətəninə, dövlətinə layiqli xidmət göstəriblər. Biz də onların yolunu gedərək dövlətimizə xidmət edirik. Sizdən artıq dərəcədə xahiş edirəm, bizə köməklik edəsiniz".
Müraciətdən qeyd olunur ki, onlar "YAPSAN” firması olaraq 2018-ci ilin oktyabrında Azərbaycanın ən böyük istilik-elektrik stansiyası olan Mingəçevir İES-in təmirində subpodratçı olaraq fəaliyyət göstəriblər. Ana firma - podratçı "Elektro İndustries" QSC olub.
Bildirilir ki, hələ ana şirkət "Azərenerji” ASC ilə boyama işləri barədə müqavilə bağlanmadığına görə, onlar qeyri-rəsmi olaraq işə başladıqları üçün arada qeyri-rəsmi olaraq qiymət razılaşması əldə olunub.
Mingəçevir İES-in inşaasında iştirak edən iş adamları pullarını ala bilmirlər
Qiymət razılaşmasında, diametri 20 sm-dan böyük olan boru materiallarında 1 m2 üçün 14,70 AZN ƏDV-siz, diametri 10 sm-dan kiçik olan boru materiallarında 1 p/m üçün 4,40 AZN ƏDV-siz, diametri 10 sm-dan 20 sm-ə qədər olan metalkonustruksiya və ya boruların 1 p/m üçün 7,90 ƏDV-siz, metal boruların istiyə davamlı boya ilə rənglənməsi üçün 1 m2 17,95 ƏDV-siz qiymət təyin olunmasında razılaşıblar. 2018-ci ilin oktyabrından boya işlərinə start verilib.
Şikayətçilər bunu votsap nömrələrinə göndərilən şəkil və videolarla sübut etməyə hazır olduqlarını deyiblər.
"Mən boya işlərinə 2018-ci ilin oktyabrında başlamışam. Bunu şəkillər və videolar ilə və aldığım boyalar ilə sübut edirəm. Sonradan 2019-cu ilin aprelində "Yapsan” MMC ilə bağlanılan rəsmi müqavilə 1 m2 üçün 10,10 AZN (on manat on qəpik) rəsmi qiymət razılaşması təklif etdi və qeyri-rəsmi qiymət razılaşmasını və p/m üçün olan məbləği qeyri-rəsmi olaraq veriləcəyini əmin etdilər, boya işlərinə aid ilk ödənişi 2019-cu ilin iyununda ediblər. 2018-ci ilin oktyabrından, 2019-cu ilin aprel ayına qədər işlədiyim işin qeyri-rəsmi hissəsinin rəsmi hissəsi ilə olan fərqinin ödənişi bu günə qədər Rəşad Şirinova ödənilməyib”, - deyə şikayətçilər yazıblar.
N.Həsənov bildirir ki, bu gün həm dövlətə olan vergi borcunu ödəyə bilmir, həm də 2019-cu ilin avqustundan bu günə qədər fəaliyyətini bərpa edə bilməyib: "Üzümə də bütün dövlət orqanlarının qapıları bağlıdır. Heç bir yerdə işləməyimə də imkan vermirlər. Bu məbləğ nə az, nə çox 1 milyon 670 min manat vəsait edir. Xahiş edirəm, qeyri-rəsmi qiymət razılaşmasında təyin olunan paqon metrlərin və hər kvadrat metrə aid olan 4,60 AZN (dörd manat altmış qəpik) kəsr məbləğini mənə ödəsinlər. Mən həm dövlətə olan vergi borcumu ödəyim, həm də fəaliyyətimi bərpa edə bilim. Həmçinin Azərbaycan İES "MMC”-nin daxilində inzibati binanın təmizlik işlərini və tullantıların ərazidən uzaqlaşdırılmağını etdirmişəm. Onunda məbləği 35 000 manat edib. İndiyə kimi ala bilməmişəm. Mənim dövlətə olan vergi borcumu 2019-cu ilin avqustundan şirkətə qoyulan bloka görə bu günə qədər hesablanan, peniya da daxil olmaqla borcumun ödənilməsini tələb edirəm. Ümumi ödəniləcək məbləğ "Elektro İndustries” QSC-dən şirkətin peniyasından əlavə 1 670 000 manatdan yuxarıdır.
2018-ci ilin oktyabr ayından 2019-cu ilin aprel ayına qədər, mən Şirinov Rəşad və "YAPSAN” MMC Azərbaycan İstilik Elektrik Stansiyasıında "Elektro İndustries” QSC ilə ümumilikdə 2.631.628,87 manatlıq müqavilə bağlamışıq. Bunun müqabilində gördüyüm işlər üçün bir milyon manatadək avans köçürülüb. Lakin həmin 7 ay müddətində boya işlərindən qeyri-rəsmi olaraq 800.000 manatdan çox iş görmüşəm. Şirkətimin də blok olunmağı, sanksiya qoyulmağı və ümumi olaraq sahibkar kimi dəymiş ziyanın ödənməsini tələb edirəm. Müqavilənin uzanma müddəti "Elektro İndustries” QSC-nin rəhbər heyətinin səhlənkarlığı ucbatından olmuşdur. Xahiş edirəm, insani hisslərlə yanaşı, mənim həm şirkətimin yenidən bərpasını həll edəsiniz, həm də mənim həmin müddətdə yaranan borclarımın qarşılığını ödəyəsiniz”.
"Baba Rzayevin qardaşı Emin Rzayev pulumu yeyə bilməyəcək"
Müraciət müəllifi qeyd edir ki, bütün bu qanunsuzluqların arxasında "Azərişıq” Açıq Səhmdar Cəmiyyətinin rəhbəri Baba Rzayevin qardaşı Emin Rzayev dayanır: "Baba Rzayevin qardaşı Emin Rzayev pulumu yeyə bilməyəcək. Lakin xəstəlik tapıb ölməmiş bütün bunlar baş verməlidir. Cənab Prezident, xahiş edirəm ki, Sizin dövlət büdcəsindən ayırdığınız vəsaitlə görülən bu layihə ilə bağlı boya işlərinin smetası yenidən hesablansın, yoxlanılsın, həqiqət üzə çıxsın. Nəyə görə Emin Rzayev daha çox qazansın, biz ziyana getməliyik, evimi, maşınımı satmalıyam?”, -deyə müraciətdə sual olunur.
Baba Rzayev
Müraciətdə deyilir ki, Emin Rzayev onların pulu ilə özünə şərait yaradır: "Ad qazanır, ancaq mən məhv oluram. Hətta Baba Rzayevi aldadıb ki, artıq pulu Şirinov Rəşada vermişəm. Halbuki heç ziyanımı qarşılamadı. Mənə yalvarırdı ki, cənab sədr bizi qovmasın, sən bütün işləri bitir, mən sənin nə xərcin varsa verəcəyəm”.
"Azərenerji” tərəfindən "Elektro Industries” QSC-yə boya işlərinə görə "AZIES Mingəçevir” layihəsinə görə normal pul ayrılıb.
Müraciətdə qeyd olunur ki, həm paqonmetr, həm kvadratmetr üçün ödəniş olmalıydı: "Mən strateji obyektdə özbaşına necə iş görə bilərdim? Ən böyük obyekt inzibati bina, laboratoriya binası (6 mərtəbə), maşın zalı və bir çox layihələr bitirmək üçün mənə yalvardı, axırda pul verilməyəndə Rəşad bacarmadı? Ona görə Prezident gəlib razı qaldı, təşəkkür etdi. Allah görür, haqqımı kəsənlər cavab verəcəklər”.
Rzayevlərin ailə biznesi
Baba Rzayevin qardaşı Emin Rzayevin adı zaman-zaman korrupsiya əmələrində hallandırılıb. 2012-ci ildə araşdırmaçı jurnalist Xədicə İsmayıl yazdığı "Baba Rzayevin ailə biznesi" adlı araşdırma yazısında qeyd edir ki, bu ailənin üzvlərinə Azərbaycanda elektrik məhsullarının satışından tutmuş, elektrik təchizatı ilə bağlı dövlət sifarişlərinin icrasına qədər ciddi işlərlə məşğul olan bir neçə şirkətin təsis sənədlərində rast gəlinir.
Bakıda Böyük Şor şosesində işıqlı, çilçıraqlı binası ilə göz oxşayan Santral Elektrik LTD şirkətinin səhmlərinin rəsmi sənədlərə görə 70 faizi Baba Rzayevə, 30 faizi onun həyat yoldaşı Nərminə Həsənovaya məxsusdur.
Santral Elektrik LTD Ədliyyə Nazirliyində 2003-cü ildə qeydiyyata alınıb. O vaxt şirkətə Emin Rzayev – Baba Rzayevin qardaşı rəhbərlik edirdi.
Nicat Həsənov və Rəşad Şirinovun videomüraciətini təqdim edirik:
