İsti yay günlərində Bakı sakinləri su problemi ilə üzləşib. Paytaxtın müxtəlif ərazilərində sular kəsilib.

Bizimyol.info xəbər verir ki, susuzluq problemi Bakının həm mərkəzi hissəsində, həm də ətraf qəsəbələrdə - Yasamal, Nəsimi, Xətai, Xəzər rayonları da daxil olmaqla, əksər ərazilər müşahidə olunur.

Nəsimi rayonu, Əlibəy Hüseynzadə küçəsində yaşayan 70 yaşlı Həbibə Məmmədova deyir ki, iyulun 23-də səhər saatlarında qəfildən su kəsilib: “Heç bir xəbərdarlıq etmədən, bu isti yay günlərində suyu kəsiblər. Əvvəllədn heç nə deyilməmişdi, ona görə ehtiyat su da yığmamışdıq. Təsəvvür edirsiniz nə vəziyyətə qaldıq? Elə bir maddi imkanımız da yoxdur ki, gedib mağazadan pulla su alaq. Belə biabırçılıq olar? 40-45 dərəcə istidə adamı susuz qoymaq Yezidlikdir”.

Xəzər rayonu, Mərdəkan qəsəbəsinin sakini Elmar Məmmədov bildirir ki, qəsəbədə bir həftədir su yoxdur.

Yeni Ramana qəsəbəsinin sakini Röyal Qasımov da 5 gündür susuz qaldıqlarını deyir.

Pirşağı kəndində günboyu susuzluqla sınanan sakin, axşam saatlarında içəcək qədər suyun gəldiyini bildirir.

Suraxanı rayonu, Yeni Günəşli V massivində yaşayan Emil Abdullayev də 2 həftədir ki, su ilə sınağa çəkildiklərini bildirir.

İri Şəhərlərin Birləşmiş Su Təchizatı Xidmətinin mediaya açıqlamasında iddia olunur ki, yayda havaların kəskin istiləşməsi nəticəsində suya olan tələbat artır. Mövcud qurğular və sudaşıyıcı kəmərlər ifrat yüklənir: “Əsas su gətirici magistral kəmərlərin üzərindəki, mühafizə zolağındakı mövcud tikililər suyun şərq zonasına çatdırılmasında və rejim tənzimlənməsində də əlavə problemlər yaradır.

Bütün bu amillər təchizatda fasilələrə səbəb olsa da, hazırda intensiv və sistemli tədbirlər görülür. Ümumilikdə fasiləsiz, o cümlədən qrafik rejimi əsasında su ilə təmin edilən kifayət qədər ərazilərin isti hava şəraiti səbəbindən su təminatı rejimində dəyişiklik edilməsi zərurəti yaranıb”.

Adıçəkilən qurum isti hava şəraitində mövcud problemlərin təsirinin minimuma endirilməsi məqsədilə abonentlərdən sudan daha da səmərəli istifadə etməyi xahiş edib.