Tovuz-Qazax Regional Təhsil İdarəsinin, Ağstafa Təhsil Şöbəsinin və Ağstafa Rayon İcra Hakimiyyətinin razılaşdırılmış hərəkətləri ilə Ağstafa rayonunda təhsil müəssisələrinin rəhbər vəzifələrini təmənna qarşılığında “pay-püşk” etmələri, yaxud, məktəb direktorlarına, direktor müavinlərinə kreslolarını qorumaq üçün müəyyən şərtlər irəli sürmələri barədə indiyədək çox demişik, çox yazmışıq. Söz yox, haqqa, ədalətə, qanunun aliliyinə, öz savadlarına güvənib “Triada”nın şərtlərinə boyun əyməyən istisna şəxslər də tapılırdı. Məsələn, Ağstafa şəhər Asif Abdullayev adına 2 nömrəli tam orta məktəbin direktoru Vəfa Tağıyeva kimi.
Bu yerdə qeyd etməyə dəyər ki, sözügedən məktəb rayonun ən qabaqcıl, müəllim və şagird sayına görə ən böyük kontingentli təhsil müəssisələrindən biri olduğuna və az-çox imkanlı valideynlərin yaşadığı şəhər inzibati ərazi vahidində yerləşdiyinə görə həmişə rəhbərliyin “xüsusi diqqət” mərkəzində olub, məktəbdə təyinatlara “həssas” yanaşılıb. “Triada” Vəfa Tağıyeva kimi mübariz təhsil içilərini gözdən salmaq üçün ən çirkin üsullara əl atmaqdan belə çəkinmir. Elə “Triada”nın ən ucuz əlaltıları kimi qabağa verdikləri, daha “yağlı” vəzifə vəd edib baş redaktorumuza qarşı xüsusi ittiham qaydasında məhkəmə davası açmağa təhrik etdikləri Afaq Mustafayeva — Bayram Mustafayev cütlüyünün məhkəmədə israrlarından biri bu idi ki, Ağstafa təhsil sistemindəki qanunsuzluqlar barədə məlumatları redaksiyamıza ötürən mənbənin məhz Vəfa Tağıyeva olduğunu boynumuza götürək. Hətta məhkəmə zalından kənarda, dəhlizlərdə bizə mesaj verirdilər ki, belə etsək, bizə qarşı iddalarından vaz keçəcəklər. Görünür, onlar hesab edirlər ki, Elm və Təhsil Nazirliyinin baxış bucağında təhsil işçilərinin korruptiv əməllərinin ictimailəşdirilməsi elə də qəbahət deyil, amma bu əməllər barədə infomasiyanın məhz təhsil işçisi tərəfindən mətbuata ötürülməsi bağışlanmazdır. Təbii ki, biz belə çirkin sövdələşməyə gedə bilməzdik, hətta informasiyanı anonim verən əsl mənbəyə də verdiyimiz sözü tutub adını açıqlamadıq. Məhkəmənin çıxardığı, bizim xeyrimizə olmayan qərara da hörmətlə yanaşdıq.
2 saylı məktəbə son 9 ay ərzində 10 dəfə yoxlama komissiyası göndərib Vəfa Tağıyevanı ləkələyəcək heç nə tapmasalar da, nəhayət, onu vəzifədən kənarlaşdırmağa, yerinə isə “qollarına qolay” adam təyin etdirməyə nail oldular. Bu azmış kimi, Afaq Mustafayevaya 2 saylı məktəbin təşkilati məsələlər üzrə direktor müavini vəzifəsini peşkəş etdilər. Özü də heç bir imtahan götürmədən. Həmin vəzifənin əvvəlki sahibi ilə necə rəftar edildiyi barədə isə həmin şəxsin qardaşı sosial şəbəkədə müfəssəl yazmışdı. Söz gəzir ki, onun həyat yoldaşı Bayram Mustafayev də Qaçaq Kərəm kənd orta məktəbində təsərrüfat müdiri vəzifəsindən 2 saylı şəhər məktəbinə transfer edilməklə mükafatlandırılacaq.
Sadiq oxucularımız xatırlayarlar: Söhbət o Afaq Mustafayevadan gedir ki, Ağstafa rayonu üzrə təhsil sektorunun müdiri Mədət Bayramovun yanında “hüdudsuz xətir-hörmətindən” istifadə edərək, əri Bayram Mustafayevin Qaçaq Kərəm kənd orta məktəbində təsərrüfat müdiri vəzifəsinə düzəldilməsinə nail olub.
O Afaq Mustafayeva ki, heç də quru maaş hesabına toplamadığı pullarını anası Fazilə xanımın əli ilə zinət əşyaları girov götürmək hesabına faizlə borc verir və onların sələm tələsinə düşənlərdən biri olan Siranuş Eyyubova da hüquq-mühafizə orqanlarında həlli düyünə düşən şikayətini “Dəryaz” qəzetinin səhifələrinə çıxarmışdı.
O Afaq Mustafayeva ki, “Dəryaz” qəzeti redaksiyasına açdığı telefonda özünü Dövlət Təhlükəsizlik Xidmətinin əməkdaşı kimi təqdim edərək bizi təhdid etmişdi, sonra da yalanının üstü açılmışdı.
Əlbəttə, yazdığımız tənqidi məqalələrin tam təsirsiz ötüşdüyünü demək olmaz. Mədət Bayramova da, Afaq Mustafayevaya da “xala xətrin qalmasın” töhmət verilmişdi. Bu fakt Qazax-Tovuz Regional Təhsil İdarəsinin müdir müavini Nizaməddin Babanlının etirafedici səs yazıları ilə təsdiqlənib. Lakin ictimai rəyin tənbehin elə də sərt olmayan bu növü ilə qane olmayacağını görüb “qara məni basınca, qoy qaranı mən basım” taktikasını seçdilər. İddiaçıların, ifadələrini əhəmiyyətli hesab etdiyimiz bəzi şəxslərin şahid qismində iştirakını istəmədikləri məhkəmədə qazandıqları müvəqqəti, “Pirr qələbəsi” onları arxayınlaşdırmasın. Çünki haqq nazilər, üzülməz. Mədət Bayramovun həyat yoldaşının öz ərinin heç də fəxarət doğurmayan ləğəbinin nə olduğunu məhkəmə zalında dilə gətirməsi də faktdır. Afaq Mustafayeva və Bayram Mustafayevin ikincinin qardaşı morqda olarkən cibindən seyf açarlarını götürüb mərhumun həyat yoldaşından xəlvətcə saxlancdakı pul vəsaitini və zinət əşyalarını mənimsəmələri barədə şikayət də hələ hüquq-mühafizə orqanlarında araşdırılmaqdadır.
Haqlı suallar ortaya çıxır: Bəyəm normal adam barəsində bu qədər fərqli-fərqli ittihamlar səsləndirilməlidirmi, əsassız olsa belə? Normal adam barədə bu qədər şikayət olmalıdırmı, təsdiqini tapmasa belə? Normal adamın işi bunca məhkəmə müstəvisinə çıxmalıdırmı, çəkişməni udsa belə? Sən kim olasısan ki, hamı səni şərləmək, üstünə böhtan atmaq istəyir? Bütün bu sualların cavabı budur ki, ocaq yanmasa, tüstü çıxmaz.
“Dəryaz” qəzeti
