“Təzadlar” saytının 27 mart 2018-ci il tarixli buraxılışında “Goranboy rayon İcra Hakimiyyətindən “Təzadlar”da dərc edilmiş yazıya cavab” başlıqlı yazı təqdim edilmişdir. Həmin yazı-məktubda “Təzadlar” qəzetinin 20 mart 2018-ci il tarixli nömrəsində dərc edilmiş “Goranboyun icra başçısı qocaman fermerə qan uddurur” sərlövhəli yazıya aydınlıq gətirilmişdir. Redaksiya “KİV haqqında” Azərbaycan Respublikası Qanunun tələblərini nəzərə alaraq həmin cavabı olduğu kimi təqdim etmişdi. Cavab məktubunda tanınmış fermer Akif Rzayevin (qəzetin 20.03.2018-ci il tarixli sayında dərc olüunub) Göranboy rayonunda başına gətirilən problemlərlə əlaqədar Prezident İlham Əliyevə müraciətindəki bir sıra xüsusatlar təkzib edilirdi.
Şikayətçi-fermer Akif Rzayevin də bu cavaba cavabı özünü çox gözlətmədi. Sonuncunun “Təzadlar” qəzeti redaksiyasına göndərdiyi məktub-müraciətinə bir sıra sənədlər də əlavə olunub və dərc olunmasını xahiş edir. Redaksiya bir daha tərəfləri sülhə və orta məxrəcə gələrək yaranmış vəziyyətdən kompromislə çıxış yolu tapmağa dəvət etməklə, A.Rzayevin cavabını ixtisarla təqdim edir:
Çox hörmətli redaksiya!
Ötən saylarınızda Göranboy rayonunda qış otlaq sahəmdə yaranmış vəziyyətlə əlaqədar dərc etdiyiniz obyektiv yazınıza görə sizə bir daha minnətdarlıq edirəm. Siz məni yox, əslində, haqqı müdafiə etmisiniz. Çünki mən sadə bir fermerəm, dövlətdən heç bir xərc, yardım istəmədən qoyunçuluq təsərrüfatı yaradaraq ölkənin ərzaq təhlükəsizliyi ilə bağlı cənab Prezident İlham Əlyievin çağırışlarına kokret əməli işimlə cavab verməyə çalışıram. Lakin bir daha təəssüf hissi ilə deyirəm ki, Göranboy rayon İH başçısı Nizaməddin Quliyev mənə ciddi problemlər yaratmışdır.
Saytınızda Goranboy RİH-nin rəsmi cavabını oxudum. Bu onların haqqıdır, siz də qanunun tələblərini əsas tutub dərc etmisiniz. Lakin orada bir sıra yalnış və doğru olmayan iddialar vardır ki, mən rəsmi sənəd və sübutlarla təkzib edirəm. Həmin sənədlərin surətini sizə göndərirəm.
Beləliklə, Goranboy RİH-nin cavabında yazılır ki, “Akif Rzayev rayon icra hakimiyyətinin başçısına ünvanladığı və Gəncə poçt şöbəsindən göndərdiyi 29 yanvar 2014-cü il tarixli ərizəsində icarəsində olan torpaq sahəsinin 800 hektarının geri qaytarılmasını xahiş etmiş, onun xahişi nəzərə alınaraq 02 may 2014-cü il tarixli sərəncamla 800 hektar torpaq sahəsi geri qaytarılmış, qalan 1847 hektar qış otlaq sahəsi üçün onunla yeni icarə müqaviləsi baqlanmışdır... A.Rzayev müxtəlif dövlət orqanlarına və KİV-lərə ünvanladığı şikayətlərdə icarəsində olan qış otlaq sahəsinin 800 hektarının onun ərizəsi olmadan, əsasız olaraq geri qaytarıldığını iddia edir. Rayon İH-nin müraciəti əsasında rayon Polis şöbəsi tərəfindən araşdırma aparılmış, məhkəmə xətşünaslıq ekspertizası təyin edilərək 01 fevral 2018-ci il tarixdə rəy alınmışdır. Məlum olmuşdur ki, A.Rzayevin rayon İcra Hakimiyyətinə ünvanladığı ərizə onun tərəfindən imzalanmışdır” və s.
Bəli, mənim elə bir ərizəm olmuşdur. Həmin ərizənin surətini sizə göndərirəm, diqqət edin, görün orada nə yazılmışdır. Yazılır ki, icarədə olan 700-800 ha torpaq sahəsi ot bitməyən, keçəl, şoranlıq ərazilərdir. Həmin ərazilərə görə də digər sahələr kimi icarə haqqı ödəyirəm, xahiş edirəm həmin ərazilərin icarə haqqının azaldılması üçün qanun əsasında mənə köməklik edəsiniz. Ərizədə qeyd olunmur ki, həmin əraziləri kəsib Yasin Hüseynov adlı şəxsə verin, ona tapşırın ki, ferma kompleksini mənim fermamın 200 metrliyində tikdirib günümüzü qara edin! Hər gün burada Y.Hüseynovun çoban itləri ilə bizim fermanın itləri boğuşur, qan su yerinə axır, iş gücümüz bu itləri aralamaqdır. Belə təsərrüfat qurulur? Başçı Nizaməddin Quliyevə dəfələrlə məni qəbul edəndə bunu demişəm. Bildirmişəm ki, kimə harda torpaq verirsiniz, öz işinizdir, amma niyə icazə verdiniz ki, mənim fermamın düz qarşısında bu boyda tikinti apardı? Başçı yalandan məni çağırır, deyir, kişi kimi söz verirəm, sən mənim ağsaqqalımsan, get narahat olma, ferma sökülüb başqa əraziyə köçürüləcək. Məni arxayın edir, sonra xəlvətcə Yasin Hüseynova sərəncam imzalayır ki, yerini daha da bərkitsin. Problem bundadır.
Cavab məktubunda yazılır ki, “A.Rzayev 12 dekabr 2017-ci il və 02 fevral 2018-ci il tarixlərdə rayon İcra Hakimiyyətinin başçısı tərəfindən qəbul edilmiş, müraciəti ilə bağlı onunla lazımi söhbət aparılmışdır. O, ərizədə qeyd etdiklərinin əsassız olduğunu səmimi etiraf etmiş, bir daha belə müraciətlər etməyəcəyini bildirmişdir”.
Bu tamamilə yalandır. Əksinə, başçı müavininin yanında mənə söz verdi ki, tikinti dayandırılıb, sadəcə, qoy Y.Hüseynov yaza kimi heyvanlarını orada qışlatsın, izahat yazıb ki, heyvanlarını dağa qaldıran kimi fermanı söküb başqa yerə köçürəcək. Ardınca isə mənə deyib ki, fermanda erkək bəsləyirsən, onlar kimindir? Demişəm ki, Prezident seçkilərində İlham Əliyevin qələbəsinə qurban demişəm, 100 baş quzudur. Deyib ki, 50-ci bəsdir, 50-ni sat gətir. Demişəm ki, mən bunu edə bilmərəm. Bundan sonra başçı Nizaməddin Quliyev mənimlə intriqa aparır. Mən də bu ilki Novruzda qurbanlıq heyvanları Goranboyda deyil, Daşkəsəndə kəsdim, fotoşəkillər də var, mərasimdə icra başçısı Əhəd Abieyv də iştirak edib.
Başçının daha bir yalanı: cavabda yazır ki, “A.Rzayev nə hüquqi şəxs, nə də fiziki şəxs kimi heyvanlarının olması barədə Rayon Statistika idarəsinə heç bir məlumat verməmişdir. Belə başa düşülür ki, A.Rzayevin özünə məxsus heyvanı yoxdur, icarəsində olan torpaq sahəsindəki heyvanlar başqalarına məxsusdur. O, torpaq sahələrini digər heyvandarlara satmaqla möhtəkirlik edir”.
Tanınmış fermerlə icra başçısının qalmaqalı böyüyür
Bu qədər yalan danışmaq, əsassız iddialar irəli sürmək olarmı? Hörmətli “Təzadlar”, mən sizə Goranboy rayon Statistika Komitəsindən heyvanlarımın baş sayı barədə aldığım arayışın surətini göndərirəm. Xahiş edirəm, fotosunu dərc edin, Nizaməddin Quliyev bir daha belə yanlış ifadələr işlətməsin.
Hörmətli redaksiya! Mən Daşkəsən rayonundan respublikanın ilk fermer kimi, Yeni Azərbaycan Partiyasının üzvüyəm, 72 (yetmiş iki) yaşım var. Goranboy rayon İcra Hakimiyyətinin Başçısı Nizaməddin Quliyev tərəfindən artıq müntəzəm olaraq təzyiqlərə və təhdidlərə məruz qaldığım üçün məcbur olub aidiyyəti qurumlara müraciət etməkdəyəm. Mən görmüşüm ki, yerli icra hakimiyyətləri sahibkarların qayğısına qalır, diqqət göstərir. Lakin Goranboyun İH başçısı artıq elə vəziyyət yaradıb ki, mən çarəsiz durumdayam. Ya öz halal və min bir zəhmətlə hasilə gətirdiyim, tikib-qurduğum təsərrüfatı məhv etməliyəm, ya da Nizaməddin Quliyev bu intriqalara son verməlidir. Dəfələrlə Prezident Administrasiyasında, Nazirlər Kabinetində, Əmlak Komitəsində, Milli Məclisdə, Baş Prokurorluqda qəbullarda olmuşam, vəziyyəti rəsmi sənədlərlə görənlər təəccüb qalıblar ki, belə də iş olar? Mən ahıl yaşımda qoyun-quzu bəsləyir, dövlətimə bu yolla xidmət göstərirəm, icra başçısı isə tərsinə addımlar atır, məni bu işdən əl çəkməyə sövq edir.
Hörmətli redaksiya! Siz Allah şahidisiniz, çünki münaqişəli mövzu ilə əlaqədar yerində olmuş, vəziyyəti görmüsünüz. Belə vəziyyətdə nə etməliyəm? Başqası olsaydı, hər şeyə tüpürüb rahat həyat sürər, istirahəti ilə məşğul olardı. Lakin mən vicdanımın səsi ilə çalışır, zəhmət çəkir, ölkəmin ərzaq proqramında az da olsa töhfə vermək istəyirəm, lakin Goranboyun İcra başçısı Nizaməddin Quliyev mənə təzyiqlər edir, təhdid edir, işləməyə qoymur. Xahiş edirəm, haqq səsimi ölkə rəhbərliyinə çatdırın, Nizaməddin Quliyevin əsassız, qanunsuz hərəkətlərinə son qoyulsun. Hazırda təsərrüfatımda olan 4000-4500 yaxın qoyunlar və otlaq ərazim Goranboy rayon İcra Hakimiyyətinin Başçısı Nizaməddin Quliyev tərəfindən şəxsi ədavətin qurbanına çevrilib, blokadada saxlanılır. Buna nə ad vermək olar?
Redaksiyadan: bir daha tərəflərin ortaq məxrəci taparaq yaranmış problemin tezliklə həllinə nail olmasını arzulayırıq...
