“TƏQAÜDDƏ OLAN POLİS İŞÇİSİ MƏNDƏN İZAHAT GÖTÜRDÜ”
Avtomobil qəzasına məruz qalan Hüsniyyə Zülfüqarova Bakı şəhəri Nizami Rayon Polis İdarəsinin müstəntiqi Səfərəli Həsənovdan şikayətlənir. Bu günlərdə H.Zülfüqarova redaksiyamıza müraciət edib.
Şikayətçinin daxili işlər naziri R.Usubova ünvanlanmış müraciətində bildirilir ki, bu ilin sentyabr ayında Nizami rayonu, Qara Qarayev küçəsində dayanacaqda avtomobil qəzasına məruz qalıb: ""Ramal" ticarət mərkəzinin qarşısındakı dayanacaqda avtobus gözləyirdim. Bu vaxt mənə bir maşın çırpıldı. 10-HZ-552 dövlət nömrə nişanlı "VAZ 2107" markalı maşının sürücüsünə dedim ki, nə edirsiniz, mən boyda adamı görmürsünüz? Cavabında sürücü nalayiq sözlərlə məni təhqir etdi və dedi ki, sən burada niyə dayanmısan? Dedim, mən avtobus gözləyirəm, bəs sən niyə qanunsuz olaraq burada dayanırsan və əks istiqamətdə mənim üstümə maşın sürürsən?
Bədənimin maşın dəyən yeri zərbədən ağrıyırdı. Dedim, heç olmasa məni yaxınlıqdakı xəstəxanalardan birinə çatdır, bədənim bərk ağrıyır. O isə, "elə bircə bu qalmışdı" deyib söylənə-söylənə maşını sürüb getdi. Mən mobil telefonla maşının şəklini çəkdim. Sonra da bir taksiyə minib metronun "Neftçilər" stansiyası yaxınlığındakı 26 saylı poliklinikanın yanında olan təcili tibbi yardıma gəldim.
Həkimlər bədənimin zərbə alan yerini müayinə etdikdən sonra polisə xəbər verdilər. Həkimlərin məsləhəti ilə zərbə aldığım yerin sağalması üçün bədənimə təpitmə qoydum və müxtəlif mazlar çəkdim.
Aradan bir müddət keçəndən sonra Nizami Rayon Polis İdarəsindən müstəntiq Səfərəli Həsənov mobil telefonuma zəng edərək məni təcili idarəyə dəvət etdi. Mən yeriyə bilmədiyimi söylədikdə o, "taksiyə otur gəl, pulunu özüm verərəm" dedi.
Mən taksiyə oturub Nizami Rayon Polis İdarəsinə gəldim. S.Həsənov idarədə yox idi. Odur ki, taksinin pulunu verib yola saldım. Səfərəli Həsənovun kabinetinin yerini polis əməkdaşlarından öyrəndim. S.Həsənovun kabinetində təqaüddə olan polis işçisi və təcrübə keçən bir tələbə vardı.
Təqaüddə olan polis işçisi məndən izahat götürdü. Sonra mən evə qayıtdım. Aradan 15 gün keçəndən sonra müstəntiq S.Həsənov mənə zəng etdi ki, bizim özümüzdə həkim var, gəl, o sənə baxsın.
Mən müstəntiqə artıq sağaldığımı bildirdim. Ancaq buna baxmayaraq, müstəntiq S.Həsənovun təkidi ilə təzədən həkim komissiyasından keçdim. Həkim komissiyasının rəyini öyrənmək istədim, dedilər ki, rəylə tanış olmağa icazə verilmir.
Sonra dəfələrlə müstəntiq S.Həsənovdan qərarı istəsəm də, hər dəfə hazır olmadığını deyirdi. Oktyabr ayının əvvəlində S.Həsənova zəng edib qərarın taleyi ilə maraqlananda, o, sənədləri Dövlət Yol Polisi İdarəsinə göndərdiyini bildirdi. Soruşanda ki, ora niyə göndərmisiniz, dedi, hadisədə cinayət faktı olmadığına görə belə məsləhət bilinib.
Daha S.Həsənova deməyə söz tapmadım. çünki onun sözündən belə çıxdı ki, cinayətin baş verməsi üçün mütləq ölməliydim?"
***
H.Zülfüqarovanın şikayəti qəzetimizdə dərc edildikdən sonra o, Nizami Rayon Polis İdarəsindən cavab məktubu alıb. Ancaq H.Zülfüqarova məktubdan heç nə başa düşməyib. Odur ki, yenidən bizə müraciət edərək, Nizami RPİ-nin İŞ-nin rəisi polis polkovnik leytenantı Elnur Nəbiyevin məktubuna aydınlıq gətirməyimizi istədi. Düzü, biz də məktubdan bir məna çıxara bilmədik. Və dərc etmək qararına gəldik ki, məktubdan başa düşdüklərinizi bizə də anladasınız.
Bu əminliklə məktubu olduğu kimi dərc edirik:
"Hörmətli Hüsniyyə Zülfüqarova!
19.08.2011-ci il tarixdə Nizami rayonu Q.Qarayev prospektində "Ramal" ticarət mərkəzinin qarşısında naməlum sürücünün idarə etdiyi VAZ-2107 markalı 10 HZ 552 dövlət nömrə nişanlı avtomaşınla vurularaq xəsarət almağınız faktına görə Nizami RPİ-də araşdırma aparılmış və toplanmış material üzrə sürücünün əməlində cinayət tərkibi müəyyən olunmadığına görə cinayət işi başlanması rədd edilmişdir.
Hadisə yerindən qaçmış sürücünün müəyyən edilərək barəsində inzibati cəza tədbiri görülməsi üçün material Nizami RPİ-nin DYPŞ-nə göndərilir.
Məlumat üçün nəzərinizə çatdırılır ki, AR CPM-nin 212-ci maddəsinə əsasən qəbul edilmiş qərardan prokurora və yaxud məhkəməyə müraciət edə bilərsiniz.
Hörmətlə,
Elnur Nəbiyev,
Nizami RPİ-nin İŞ-nin rəisi, polis polkovnik-leytenantı"
***
Vətəndaş H.Zülfüqarova və bizim üçün də təəccüblüdür ki, avtomobilin markası və dövlət nömrə nişanı məlumdursa, tapılması bu qədərmi imkansızdır? Yaxud, hadisə törədən sürücü tapılmayıbsa, onun əməlində cinayət tərkibinin olmadığı hansı dəlil və sübutlarla müəyyən edilib? Görəsən, cinayət tərkibi dedikdə, sürücü avtomobili ilə vurduğu adamı mütləq öldürməli, yaxud qol-qıçını sındırmalı idimi? Vətəndaşı dayancaqda dayandığı yerdə maşınla vurub, sonra da məsxərəyə qoymaq, təhqir etmək nə tərkiblidir?
Şöbə rəisi yazır: "Hadisə yerindən qaçmış sürücünün müəyyən edilərək barəsində inzibati cəza tədbiri görülməsi üçün material Nizami RPİ-nin DYPŞ-nə göndərilir". Yəni hələ göndərilməyib. Görəsən, göndəriləcəkmi? çünki Nizami RPİ-nin DYPŞ-dən hələ də bir səs-soraq yoxdur. Vətəndaş H.Zülfüqarovanı da narahat edən və yenidən redaksiyamıza gətirən də bu idi...
