Bakı şəhəri, PirAllahı rayonu, Suleyman Bağırov küçəsi mənzil 5 ünvanında yaşayan Qasimi Əsmər Ağaqulu qızı tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, Maştağada yerləşən 1 nömrəli Respublika Psixiatriya Xəstəxanasında xəstələrə işgəncə verilir:

“Mən, Qasimi Əsmər Ağaqulu qızı, yazaraq bildirirəm ki, anam Zeynalova Tamara İsaq qızı illərdir Bipolyar pozuntu xəstəliyindən əzikyyət çəkir. Xəstəliyinin adını demək olar ki, təzə öyrənmişik. Bir çox psixiatrlarda olmuşuq. Son zamanlar iynə-dərmanın da köməyi olmurdu. Axırda həkimlər dedi ki, iynə-dərman da kömək etmirsə, aparıb Maştağa Psixiatriya xəstəxanasına qoyun, orada nisbətən düzəlmək şansı olacaq.

Elə vaxt olur 1 ay tutmur, tutanda isə aylar çəkir. Nə gecə yatır, nə gündüz. Evdəki insanları görməyə gözü yoxdur. Hər kəsə qarşı aqresivdir. Bir söz deyən kimi 102 qaynar xəttini yığıb kömək istəyir. Evdə saxlaya bilmirik. İmkan tapan kimi qaçıb gedir. Evdə hər kəslə məsləhətləşib aparıb Maştağa Psixiatriya Xəstəxanasına yerləşdirdik. Şöbə müdürü qəbul etmirdi. 500 manat pul verəndən sonra "saxlayarıq" dedi.

Xəstənaya xəstəni ümumilikdə 700 manat verdikdə götürürlər. Əks halda qəti götürmürlər. Əlimizdə olan 500 manatı verib, orda saxlatdıq. 200 manatı isə sonradan Türkiyədə yaşayan bacım həkimin kartına göndərdi. Verdiyimiz pullarla bağlı əlimizdə sübutlarımız var.

Qəbul edən həkim bildirdi ki, 21 gün müalicə edəcəyik, sağladıb sizə təhvil verəcəyik.

Həftədə bir dəfə anamın yanına gedirdim. Amma heç dəyişiklik hiss etmirdim. Həkim dedi ki, gələn həftə gəlin ananızı çıxardın. Gəlməsəniz, taksi ilə göndərəcəm.

Anamı çıxarmağa gedəndə saçının əyri formada kəsildiyini gördüm. Məlum oldu ki, başına kraska qoyulub. Donub qaldım...

Anamı çıxartdım. Öz evinə getmək istəmədi. Türkiyədəki bacımın yanına göndərdik. Orda bacıma deyib ki, xəstəxanada olan Siyavuş adlı xəstə onu hər gün döyürmüş. Başının dibi bitin içində idi. O zaman başa düşdük ki, kraskanı niyə qoyublar. Gecə "smen"inə qalan həkimlər xəstələrə çox kobud davranırlarmış. Ananmı necə döyüblərsə gözünün biri görmür. Ora anamı qoymağımıza çox peşman olmuşuq. Anam "qızlarıma deyəcəm" deyəndə isə bildiriblər ki, "kimə istəyirsən de, heç kəs sənə inanmaz. Qızların sən dəlisən deyə bura qoyublar".

Anam deyir ki, bütün xəstələrə çirkli su verirlər. Bir çoxu başa düşmür, içir.

Tez-tez yoxlamalar gəlir. Həmin vaxtı həkimlər bilirlər. Xəstələri yığıb tapşırırlar. Başlarına adam qoyurlar. Əgər kimsə nəsə desə bilir ki, axşam döyüləcək. Bu səbəbdən də susurlar.

Səlahiyyətli qurumlara müraciət edəcəyik.

Xahiş edirəm bu problemi paylaşın, ordakı xəstələrin yaxınları bilsin. Biz əlacsız qalıb ac qurdlara canımızı əmanət edirik. Onlar isə bu dünyada xəstəyə cəhənnəmi yaşadırlar".

P.S. Redaksiyamıza bu mövzuda daxil olan artıq 4-cü şikayətdir. Xanımın dediklərinin həqiqət olub-olmaması bizə qaranlıqdır.

Xatırladaq ki, “var-dövlətini ələ keçirmək üçün bacı-qardaşı tərəfindən dispanserə yerləşdirildi” sərlöhləli yazı dərc etmişdik. Yazıda adı çəkilən Camalın atası Gəncə şəhərində “Motel” restoranının sahibi olub. Onu xəstəxanaya öz doğma bacı-qardaşı yerləşdirmişdi. Səbəb isə, şikayətçinin dediyinə görə, mal-mülk məsələsi olub.

Redaksiyamıza şikayətə gələn şəxs də bildirmişdir ki, Camalı orda pul gücünə saxlayırlar. Əməkdaşımız xəstəna ilə əlaqə saxlayandan sonra isə 1 həftənin içərisində Camalı yaxınları xəstəxnadan çıxardılar. Adam 4 il idiki xəstəxanada yatırdılırdı. Əgər Camal həqiqi xəstə idisə, necə oldu yazı saytda dərc olunandan sonra xəstəxanadan buraxıldı?! Bu sualın cavabı bizə hələ də qaranlıqdır. Hazırda isə harada, necə saxlanıldığı bilinmir. İş prokurorluqda araşdırılır. Camal bəyin vəfatından sonra prokurorluq öz rəyini yəqin ki, verəcək.