Bir neçə gün öncə BakuBus-da bir aşığın əlinə saz götürüb ifa etməsi cəmiyyətdə birmənalı qarşılanmamışdı. Həmin şəxsi qınayanlardan biri də aşıq Ələsgərin nəticəsi Xətai Ələsgərlidir.
Moderator.az-a açıqlama verən ustad sənətkarın nəticəsi bildirib ki, bu hər şeydən öncə saza hörmətsizlikdir:
“Saza, sənətə hörmət qoyan adam bu cür addım atmaz. Bu sənəti gözdən salmaqdır. Heç bəyənmədim. Biri var ki, hansısa tədbirdə çıxış edir, bu bəyəniləndir. Avtobus ictimai nəqliyyat vasitəsidir. Yaşlı bir insanın sazı götürüb avtobusda ifa etməsi və cavanların onu rişxənd etməsi sənətin gözdən salınmasından başqa bir şey deyildir. İnsanın xarakteri olmalıdır. Bu olmayandan sonra sazı götürüb nəinki avtobusda, metroda da ifa edəcək. Bəzən eşidirəm ki, aşığı hamama da aparıblar. 3-4 nəfər yeyib-içib, sonra könüllərinə saz havası düşüb. Çox təəssüf edirəm belə hallara” deyə o bildirib.
Xətai Ələsgərli bildirib ki, bu sənətlə bağlı bəzi məhdudiyyətlə qoyulmalıdır:
“Müəyyən qurumlar tərəfindən sertifikat verilə bilər ki, kimə aşıq deyilə bilər, kimə deyilə bilməz? Aşıqlar Birliyi, Folklor institutu, Mədəniyyət və İncəsənət universiteti bu işlə məşğul ola bilər. Çünki hər əlinə saz alan ifaçıya da aşıq demək olmaz axı. Həmin sertifikatda da müəyyən qanunlar yazılmalıdır ki, aşıqlar ona əməl etsinlər. Qadağa qoymaq çətindir. Bugünki gündə bölgələrdəki istirahət yerlərində hərə əlinə saz alıb, çörəyini qazanır. Bəzən də sənəti gözdən salırlar. Buna nəzarət olmalıdır. Bundan başqa el qınağı da vacibdir. Hamıya aşıq, ustad demək olmaz. Həqiqətən də biyabırçılıqdır ki, əlinə saz alana ustad deyirlər. Ustad elə olmur axı. Ustad odur ki, bütövlükdə aşıq sənətini dərindən bilsin, özünün yaradıcılığı olsun və şagird yetişdirsin”, - deyə Xətai Ələsgərli bildirib.
Aşıq Zülfiyyənin isə mövzuya münasibəti belə olub:
“Sazı avtobusda ifa etmək olmaz. Sazın özünün dinləyiciləri var. Rahat oturarlar, dinləyərlər. Bu kişini məncə öyrədib avtobusa göndəriblər. Bu bizim milli musiqimizə təhqirdir. Bunu heç cür qəbul edə bilmirəm. Bir yandan da fikirləşirəm ki, bəlkə də o kişinin elə dərdi var ki, əl açıb kimdənsə pul istəməyə utanır, bu yolla 5 manat çörək pulu qazanır. Ona ürəyim də ağrıyır. Allah heç kəsi bir parça çörəyə möhtac etməsin”, - deyə sənətçi bildirib.
