Qazax rayonu, Daş Salahlı kəndinin sakini Asif Bafadar oğlu Qurbanov qızının müəmmalı ölüm işinin araşdırılmasını tələb edir. O, baş prokuror Kamran Əliyevə müraciət edərək qızının ölüm işinin nəzarətə götürülməsini və yenidən araşdırılmasını istəyir.
Baş prokurora ünvanlanan, Musavat.com-a yolladığı müraciətinin surətində yazır ki, 25 yaşlı qızı Aytac Asif qızı Qurbanova(sonradan Əliyeva) 2021-ci ildə ailə həyatı qurub.
“Öz kəndimizdən olan Adil Ayvaz oğlu Əliyev ilə el adətilə rəsmi surətdə ailə həyatı qurdu. Bu nikahdan bir övladları da var. Səhhətimlə bağlı xəstə olduğuma görə bu ilin yanvar ayının 11-də qızım və həyat yoldaşı bizə gəlib, məni ziyarət etdilər. Öz evlərinə qayıdandan sonra, səhəri gün, yanvarın 12-də xəbər gəldi ki, qızım Aytac dərman içərək özünü öldürüb. Həmin vaxt mənim bacılarım Dürdanə Qurbanova və Yeganə Məmmədova, eyni zamanda Aytacın baldızı Hava xanım da orada olublar. Hadisə də məhz onların yanında baş verib. Lakin meyiti yuyanda sinəsinin ürək nahiyəsində bıçaq yarası olduğu aşkar edildi. Mən morqda meyiti ekspertiza üçün yaran həkimlərdən soruşduqda, həkimlər bildirdilər ki, dərmandan deyil, bıçaqla öldürülüb. Bu barədə bacılarımdan növbəti dəfə soruşanda ki, bəs deyirdiniz dərman içib, bu bıçaq yarasına nə deyirsiz? Onlar həyəcanlı halda cavab verdilər ki, hə, əvvəl dərman içdi, sonra da bıçaqla özünü öldürdü. Bu, olduqca absurddur. Məsələ ilə bağlı mənə rayonun baş prokuroru Rövşən Əliyev və onun köməkçisi Nihat Əmirli bildirdilər ki, iş araşdırılır. Lakin heç bir üzləşdirmə, dindirilmə olmadığından rayon məhkəməsinə müraciət etdim. Məhkəmədən bildirdilər ki, prokurorluq tərəfindən iş artıq bağlanıb. İşi necə araşdırdıqları barədə mən prokuror Rövşən Əliyevə etirazımı bildirəndə o, özündən razı halda cavab verdi ki, “iş artıq bağlanıb, hara istəyirsən get şikayət elə!”
Müraciət müəllifi yazır ki, qızı Aytacın qaynanası Nəsibə Əliyeva isə qohum-qonşuların yanında dəfələrlə deyib ki, biz bir “meşok” pul vermişik, oğluma heç nə olası deyil.
Hörmətli Kamran müəllim! Gənc qızını itirmiş ürəyi yaralı bir ata və vətəndaş kimi Sizdən xahiş edirəm ki, qızımın qatilinin cəzasız qalmaması üçün bu cinayət işinin yenidən düzgün və qərəzsiz araşdırılmasına göstəriş verəsiniz. Ümidvaram ki, sayənizdə bu cinayət işində haqq və ədalət öz yerini tapacaqdır”.
