"Ordubadda Düylün adlı bir kənd var. Azərbaycanın ərazi bütövlüyü uğrunda döyüşlərdə bu kənd 9 igidini qurban verib..." "DİA-AZ" xəbər verir ki, bunu öz açıqlamasınd tanınımış jurnalist Heydər Oğuz qeyd edib. O daha sonra əlavə edib:

"Rəsmi məlumata görə, kəndin 800 sakini var. Həqiqətdə isə kəndin 300 sakini susuzluq və iqtisadi çətinliklər ucbatından başını götürüb xaricə köçüb. Nəticədə kənddə 500 adam yaşayır. Yəqin razılaşarsınız ki, 500 nəfərlik kənd üçün 9 şəhid olduqca böyük göstəricidir. Belə çıxır ki, kəndin hər 50 nəfərindən 1-i şəhid düşüb. Bir də uşaqları və qadınları ümumi rəqəmdən çıxsaq, bu göstərici qat-qat artar.

Düylündə bir də “xan” dövründən indiyədək susmayan bir vətəndaş var – Elsevər Əliyev. Elsevər bəy də şəhid yaxınıdır. Onun qardaşı Asiman Əliyev 2020-ci ilin noyabrın 7-də Xocavənd uğrunda gedən döyüşlərdə şəhid düşüb. Ölümündən sonra Prezident düylünlü bu igidi "Vətən uğrunda" medalı ilə təltif edib. II Şəhidlər Xiyabanında dəfn olunub. Elsevərin qaynı da, digər 3 yaxın qohumu da şəhidlik mərtəbəsinə ucalıb və onlara da müxtəlif medallar verilib.

Qısası, düylünlülərin Vətən uğrunda fədakarlığı dövlət tərəfindən də yüksək qiymətləndirilib.

Buna baxmayaraq, Ordubad icra hakimiyyəti rayon mərkəzindən Naxçıvana və digər rayonlara gedən avtobusların qayanacağını bu kəndə çox görüb. Vətən uğrunda övladlarını şəhid verən valideynlər bəzən MR paytaxtında keçirilən tədbirlərə getmək üçün km-lərcə məsafə qət edib digər kəndlərin dayanacağına getməli olurlar.

Səbəbi isə haqqında danışdığımız Elsevər Əliyevdir. Elsevər bəy “xan” dövründən indiyədək dilini dinc qoymur, əsasən rayonun ekoloji problemlərini dilə gətirir və görünür buna görə də, bütün kənd camaatı onun dilinin qurbanına çevrilirlər. Hətta adi dayanacaq belə bu kəndə çox görülür.

Bu da sizə “canişin” rejiminin və Ordubadın icra başçısı Dırnıs Rəcəb Rəhimli əfəndinin xoruz banı eşitməyən cəza metodları.

Necə deyərlər, Azərbaycan iri addımlarla demokratiyaya doğru irəliləyir. Qabaqda da Naxçıvan MR".