Bakıda 36 yaşlı qadın liposaksiya (bədənin müxtəlif nahiyələrindən piyin çıxarılması) əməliyyatından sonra vəfat edib.

“DİA-AZ” xəbər verir ki, bu barədə onun yaxınları məlumat verib.

Bildirilib ki, məşhur kouç (şəxsi inkişaf mütəxəssisi - red.) və psixoloq Nilufər Abdulla “Etalon” hospitalda plastik əməliyyat olunub. Əməliyyatdan sonra onun vəziyyəti ağırlaşıb və vəfat edib.

1989-cu il təvəllüdlü Nilufər Abdulla 3 uşaq anasıdır.

Qeyd edək ki, liposaksiya bədənin müxtəlif nahiyələrindən (üz, boyun, qolların yuxarı hissələri, qarın, bud nahiyələri, dizin iç tərəfləri, kürək) piylərin alınması deməkdir. Liposaksiya çəki azaltmaq əməliyyatı olmayıb, diet və idmanla çəkilməyən piylərin alınması məqsədilə edilir. Bu əməliyyat bədən şəkilləndirmədə tək və ya üz gərmə, abdominoplastika, ayaq gərmə ilə birgə mümkün olan hallarda edilə bilər.

"DİA-AZ" xatırladır ki, "Etalon" Hospital son günlər özünün naşı həkimləri ilə ad çıxarıb. elə bir neçə gün əvvəl bu "tibb ocağından" Türkiyə vətəndaşı olan azərbaycanlı tanınmış aktrisa Natavan Gümet şikayətçi düşmüşdü.

Məlumat üçün bildirək ki, Etalon Hospital və Avrasiya Klinikası eyni şəxsin rəhbərliyində fəaliyyət göstərir. Bu isə xəstə hüquqlarının pozulması və tibbi səhlənkarlıqla bağlı məsuliyyətin bir mərkəzdə cəmlənməsi anlamına gəlir.

Xatırladaq ki, ölkədə son illərdə estetik əməliyyatlar zamanı baş verən tibbi səhvlər, ölüm halları və səhlənkarlıqla bağlı çoxsaylı faktlar ictimaiyyətdə narahatlıq doğurur.