Birinci Qarabağ müharibəsində Daxili Qoşunların tərkibində könüllü xidmət etmiş naxçıvanlı keçmiş döyüşçülər hələ də veteranlıq statusu ala bilmədiklərindən şikayət edirlər. Onlar bildirirlər ki, 1990-93-cü illərdə Sədərək, Babək, Şahbuz rayonlarının müdafiəsində, eləcə də Qarabağda gedən döyüşlərdə iştirak ediblər. Lakin, üstündən 30 il keçməsinə baxmayaraq onlar hələ də öz haqlarını ala bilmirlər.
Şikayətçilərdən Məhəmməd Hüseynov deyir ki, sənədləri qaydasında olsa da, aidiyyəti qurumlar onların müraciətinə baxmaqdan imtina edirlər:
“1990-1993-cü illərdə könüllü yazılaraq Daxili Qoşunların tərkibində Sədərəkdə, Şahbuzda, Babəkdə torpaqlarımızın müdafiəsi uğurunda vuruşmuşam. Ara-sıra Qarabağda gedən döyüşlərdə də iştirak etmişəm. Arxiv sənədlərimdə hər şey yazılıb. Hərbi biletimə də vurulmuşdu bunlar. Üç il can qoymuşam. İndi artıq yaşım keçib. Məqsədim odur ki, haqımı ala bilim. Ən azından bizim vətən üçün döyüşdüyümüz övladlarımız üçün bir mirasdır, bir nümunədir. 93-cü ildə könüllü batalyonlar qərarla ləğv edildi. Dəfələrlə müraciət etməyimizə baxmayaraq veteran statusu ala bilmədik. Əvvəllər veteranlıq statusu ala bilməyən döyüşçü yoldaşlarımızdan bəziləri 44 günlük müharibədən sonra veteran vəsiqəsi ala bildilər. Lakin mən və bəzi yoldaşlrımızın haqıq hələ də tanınmayıb.”
3 il Daxili Qoşunların tərkibində olan könüllü batalyonda torpaqların müdafiəsi uğurunda döyüşmüş T. Həsənov da bu günə qədər veteranlıq statusu ala bilməməsindən şikayətlənib:
“1993-cü ildə könüllü batalyonlar ləğv edildi. Bundan sonra dəfələrlə müraciət etsəm də müraciətim cavabsız qaldı. 3 il ev-eşik, ailə-uşaq üzü görmədik. Bizim üçün önəmli olan torpaqlarımızın müdafiəsi idi. Hazırda döyüşlərin səhhətimdə yaratdığı problemlərlə yaşayıram. Veteran statusu bizim də haqqımızdır. Son zamanlar bəzi keçmiş döyüşçü dostlarımız nəhayət ki, status ala bildilər. Bəzi döyüşçülər isə hələ də veteranlıq statusunu ala bilməyib. Biz də haqqımız olanı almaq istəyirik. Çünki, bununla bağlı ölkə başçısının fərmanı var.”
Şikayətçilər əlavə olaraq qbildirirlər ki, problemlə bağlı bir il əvvəl yenidən Azərbaycan Daxili İşlər Nazirliyinə müraciət ediblər. Onlara sənədlərin Daxil Qoşunlarda olduğu cavabı verilsə də, hələlik heç bir nəticə yoxdur.

"Gündəlik Naxçıvan"