Ağdam rayonunun 1-ci Yüzbaşılı kənd sakini Rasim Əliyev Yüzbaşılı kənd tam orta məktəbində ciddi qanunsuzluqların baş verdiyini iddia edir. "DİA-AZ" xəbər verir ki, şikayətçinin sözlərinə görə məktəb, direktorun qohumları tərəfindən şəxsi mülk kimi idarə olunur, tədrisin səviyyəsi isə bərbad vəziyyətdədir.
Əliyev qeyd edir ki, məsələ ilə bağlı dəfələrlə aidiyyatı qurumlara müraciət etsə də, nəticəsi olmayıb. Ağdam Rayon Təhsil Şöbəsinin müdiri Tahir Abbasov məktəbdə keçirdiyi yoxlamalardan sonra heç bir nöqsanın aşkar olunmadığını bildirsə də, Qarabağ Regional Təhsil İdarəsinin apardığı yoxlamalar zamanı onların əksi olaraq, bir sıra nöqsanlar aşkar edib. Lakin indiyə qədər heç bir tədbir görülməyib.
Vətəndaşın sözlərinə görə, Yüzbaşılı kənd tam orta məktəbində direktorun həyat yoldaşı rəsmi olaraq biologiya müəllimi kimi fəaliyyət göstərsə də, sənədlərdə onun adına musiqi dərsləri yazılıb. Vətəndaş deyir ki, vakant yerlərə yeni müəllimlərin təyin olunan zamanı direktorun qohumlarının üstünlük təşkil edir və dərs saatlarının məhz onlara verilir.
Rasim Əliyev övladlarının həmin məktəbdə keyfiyyətli təhsil ala bilmədiyini iddia edir və onların başqa kənddə yerləşən məktəbə göndərmək məcburiyyətində qaldığını bildirir. O "DİA-AZ" vasitəsilə aidiyyatı Təhsil Nazirliyinə müraciət edərək Yüzbaşılı kənd tam orta məktəbində baş verən özbaşnalıqların araşdırılmasını və tədbir görülməsini xahiş edir edir.
