“Artıq xeyli müddətdir ki, Bakı şəhərində söküntü işləri gedir. Söküntülər həm köhnə çoxmənzili yaşayış binalarında, həm də fərdi yaşayış evlərindən ibarət olan yaşayış ərazilərində aparılır. Bunlar söküldükcə həmin ərazilərdə olan kirayə evlər də kirayə mənzil bazarından çıxmış olur”.

Bu sözləri əmlak məsələləri üzrə ekspert Elnur Fərzəliyev Referans-a kirayə mənzil bazarının hazırkı vəziyyəti ilə bağlı açıqlamasında deyib.

“Hazırda söküntülər iki formada aparılır. Özəl sektor sökür və yerində yeni binalar tikir. Bu zaman həmin evlərin sahiblərinə yeni binalardan evlər verilir. Lakin bu evlər yenidən kirayə bazarına daxil olsa belə onların qiyməti yeni olduqlarına görə digərlərindən iki dəfə yüksək olur. Digər tərəfdən isə dövlət xətti ilə söküntülər aparılır ki, bu söküntülər zamanı evlər sökülür və vətəndaşlara mənzil yox, kompensasiya verilir. Bu zaman həmin ərazilərdəki mənzillər də kirayə bazarından çıxır. Yaxın gələcəkdə Bakının mərkəz, mərkəzə yaxın əraziləri, daha çox tələbələrin yerləşdiyi Yasamal, Nəsimi, Nərimanov rayonlarında, demək olar ki, əlçatan qiymətə kirayə mənzil qalmayacaq”.

Ekspert qeyd edib ki, mərkəzi ərazilərdə uyğun qiymətə mənzil tapmayan tələbələr Bakı ətrafı ərazilərə üz tutmağa məcbur qalacaqlar. Bu isə onların xərclərinin üzərinə yol xərcinin də gəlməsinə səbəb olacaq.

“Tələbələrin kirayə mənzil bazarında çəkilməsinə və kirayə mənzil bazarının az da olsa rahatlamasını təmin etmək üçün bir zamanlar mövcud olan tələbə yataqxanalarını yenidən bərpa edərək başlanıla bilər. Düzdür, artıq həmin yataqxanalar yaşayış üçün əlverişli deyil amma onların yerində daha müasir, hündürmərtəbəli, daha çox otaqdan ibarət olan yenilərinin tikilməsi məqsədəuyğun ola bilər. Bu, tələbələrin böyük qisminin mənzil problemini aradan qaldıra bilər”.