Azərbaycanın aparıcı banklarından olan “Paşa Bank” ASC-nin Gürcüstandakı törəmə bankı olan “Paşa Bank Gürcüstan” bu ilin ilk rübü ərzində 4,1 milyon lari (1,5 milyon dollar) xalis mənfəət əldə edib.
Yeniavaz.com BMG agentliyinə istinadən xəbər verir ki, “Paşa Bank Gürcüstan”ın mənfəəti əvvəlki ilin eyni dövrü ilə müqayisədə 5,5 dəfə azalıb.
Məlumat üçün qeyd edək ki, Gürcüstanda fəaliyyət göstərən 19 bankın xalis mənfəəti ötən ilin eyni dövrü ilə müqayisədə 146 milyon lari (54 milyon dollart) və ya 19,5% artaraq bu ilin yanvar-mart aylarında 894 milyon lariyə (330 milyon dollar) çatıb. Ölkədəki 19 bankdan 15-i mənfəətlə, 4-ü isə zərərlə fəaliyyət göstərib.
“Bank of Georgia” 447,5 milyon lari (166 milyon dollar) mənfəətlə siyahının zirvəsindədir (illik 15% artım). “TBC Bank” 330,3 milyon lari (122 milyon dollar) mənfəətlə ikinci yerdədir (illik 12% artım). “Liberty Bank” isə 32,4 milyon lari (12 milyon dollar) mənfəətlə ilk üçlüyü tamamlayır (illik 9% artım).
Eyni zamanda, 2026-cı ilin aprel ayında “Basisbank” ilə “Liberty Bank” arasında satınalma müqaviləsi imzalanıb və tərəflərin bir il ərzində birləşməsi planlaşdırılır. “Basisbank”ın 2026-cı ilin ilk rübündə mənfəəti 28,2 milyon lari (10,4 milyon dollar) təşkil edib.
Zərərlə işləyən banklar sırasında “Peysera Bank”, “Hashbank”, “Silk Bank” və “VTB Bank Georgia” yer alır. Ən böyük zərər isə 6,2 milyon lari (2,3 milyon dollar) ilə “Silk Bank” tərəfindən qeydə alınıb.