Daha əvvəl Maştağa sakinlərinin saytımıza müraciəti əsasında içməli su problemini işıqlandırmışdıq. Belə ki, Məmməd Əbdülhəsənov küçəsinə illər əvvəl içməli su çəkilib, hətta evlərə də verilmişdi. Ancaq sonra su təminatı dayanmışdı.

Bizim.Media məsələni ictimailəşdirəndən sonra isə problem həllini tapdı.

Yenidən Maştağa qəsəbə sakinləri tərəfindən Bizim.Media-ya içməli su problemiylə bağlı müraciət daxil olub. Ancaq bu dəfə vəziyyət bir az fərqlidir.

Belə ki, qəsəbənin Hacı Vasidbəy Xanlarov küçəsinin sakinlərinin sözlərinə görə, 1991-ci ildə qeyd olunan əraziyə sakinlər tərəfindən şirin su xətti çəkilib. Ancaq həmin sudan istifadə etmək olmur.

Onlara maraqlıdır ki, Azərbaycan Dövlət Su Ehtiyatları Agentliyi (ADSEA) tərəfindən sayğaclar qoyula və xəttin fəaliyyətə başlamasına şərait yaradıla bilər? Ümumiyyətlə, belə hallarda həll yolu nədir?

Bizim.Media mövzunu araşdırmaq üçün ADSEA-ya sorğu ünvanlayıb.

Agentlikdən bildirilib ki, qeyd olunan ərazidə İri Şəhərlərin Birləşmiş Su Təchizatı Xidmətinin mərkəzləşmiş içməli su şəbəkəsi mövcud deyil, abonentlər tərəfindən primitiv üsulla çəkilən xətlərdir:

“Təchizat sistemi olmayan ərazilərdə ADSEA-nın sifarişi ilə təchizatın qurulması məqsədilə müvafiq layihə sənədləri hazırlanıb. Layihələrin icrası şəbəkənin mövcudluğu, texniki vəziyyəti və digər amillər nəzərə alınmaqla həyata keçirilir. Yaşayış məntəqələrində tullantı su şəbəkəsinin inşası tədbirlər planına uyğun olaraq mərhələlərlə aparılır”.

Bəs sakinlərin təklifi rellaşdırıla bilər? Mövcud xətdən istifadəyə şərait yaradılması mümkündür?

“Həmin xətlərin gücü o vətəndaşların su təchizatını qarşılayacaq həcmdədir. Ancaq o həcm 3-5 evin təchizatını qarşılayır. Qaydaya görə 15 nəfər qoşula bilməz, ancaq qoşulsa belə, onlara su getməyəcək. Çünki xəttin gücü 3-5 su təchizatını qarşılaya bilər.

Həmçinin, orada su xətti olmadığı üçün sakinlər texniki şərt alaraq da qoşula bilmirlər. Yəni həyət evlərində su təchizatına qoşulmaq üçün mərkəzləşdirilmiş su şəbəkəsi varsa, vətəndaş sənədləriylə birgə ASAN kommunala yaxınlaşaraq texniki şərt alır.

Bunun üçün evin çıxarışı və sənədləri olmalıdır. Əgər mərkəzləşdirilmiş su şəbəkəsi yoxdursa, vətəndaş gözləməlidir ki, həmin əraziyə şəbəkə qurulsun, daha sonra o texniki şərtin alınması üçün müraciət edə bilər”, - deyə Agentlikdən bildirilib.