Son vaxtlar sosial şəbəkələrdə, xüsusilə də İnstagramda “həkim tapmaq” tendensiyası artmaqdadır. Təəssüf ki, bunun nəticəsində bir çox insan səhhətində ciddi problemlərlə üzləşir. Çünki həkim seçimində edilən kiçik bir səhv, yanlış diaqnoz və ya səhlənkar yanaşma insan həyatına bədəl ola bilər.

Mövzu ilə bağlı Gununsesi.info-ya danışan hüquqşünas Fərhad Mehdiyev bildirib ki, sosial şəbəkələr üzərindən tanımadığınız şəxslərə etibar etmək hüquqi və tibbi baxımdan çox risklidir:

“Canınızı əmanət etdiyiniz insanı yalnız dəqiq tövsiyə ilə seçin. Əgər sizi yönləndirəcək dost və tanış yoxdursa, mütləq şəkildə peşəkarlığı ilə tanınan rəsmi tibb müəssisələrinə müraciət edin.

Bu gün biz bir blogger xanımla birlikdə prokurorluğa müraciət etdik. Səbəb isə həkim səhlənkarlığının onun həyatını ciddi təhlükə altına salmasıdır:

Xanım İnstagram üzərindən G.Ç. adlı ginekoloq həkim tapır. Həkim əvvəlcə onu “AMANA” adlı klinikada müayinə edir, daha sonra isə “analıq yollarında polip” olduğunu deyərək, 12.05.2025-ci il tarixində Dövlət Sərhəd Xidmətinin Hospitalında əməliyyata alır.

Əməliyyat zahirən uğurlu görünsə də, həkim xəstəyə profilaktik antibiotik müalicəsi təyin etmir. Təxminən 10 gün sonra pasiyentin qarın nahiyəsində ağrılar başlayır.

Xəstə 15.06.2025-ci ildə Naxçıvan Mərkəzi Xəstəxanasında C.Q. adlı həkimə müraciət edir. Ona “körp bağırsaq iltihabı” diaqnozu qoyulur və nəticədə sağlam bağırsaq götürülür.

Xəstənin vəziyyəti daha da ağırlaşdığı üçün o, 01 iyul 2025-ci ildə İstanbul Acıbadem Hospitalına üz tutur. Burada bir aylıq müalicə aparılsa da, vəziyyətin ağırlığı səbəbindən sol analıq borusunun götürülməsi labüd olur. Müalicə və əməliyyatların ümumi xərci təxminən 40.000 AZN təşkil edir”.