Ötən gün İsraildə xəstəxanaya edilən hücumdan sonra ölkənin müdafiə naziri İsrail Katz baş nazir Benyamin Netanyahu ilə birlikdə İranın ali rəhbəri Seyid Əli Ayətullah Xameneinin öldürülməsi ilə bağlı tapşırıq verdiklərini açıqladı. Bu cür hədəfli və açıq təhdiddən dərhal sonra “Hizbullah” qruplaşması Xameneinin ünvanına səsləndirilən təhdidlərə sərt reaksiya verdi. Lakin paralel olaraq İsrail baş naziri Netanyahu bildirdi ki, İrana hücumun başladığı gündən bu yana “Hizbullah” İsrailə bir ədəd də olsun raket atmayıb və qruplaşma susdurulub.

Bu vəziyyət suallar doğurur: İran hökumətinə bağlılığı ilə tanınan “Hizbullah” niyə susur? Tehranın əsas proksilərindən biri hansı siqnalları gözləyir və ya hansı manevrlə məşğuldur?

Globalinfo.az-a danışan politoloq İlyas Hüseynov bildirib ki, İran və İsrail arasında davam edən müharibə bir sıra suallara səbəb olur:

“Eyni zamanda bəzi qruplaşmaların mövqeyində çaşqınlığın yaranması müşahidə olunur. İranın siyasi-hərbi dəstəyi ilə Yaxın Şərqdə fəaliyyət göstərən qruplaşmaların sayı və təsir dairəsi kifayət qədər genişdir. Buna görə də İsrail bu proksi qüvvələri tək-tək zərərsizləşdirməklə İrana qarşı strateji zərbə planı cızdı.

Bu plan mərhələli şəkildə həyata keçirilir. İlk olaraq HƏMAS-a qarşı Qəzzada genişmiqyaslı əməliyyatlar başladı. Daha sonra isə Livanda “Hizbullah”a qarşı mövqelərin hədəfə alınması ilə davam etdi. Bu gün isə biz artıq İsrailin birbaşa İrana qarşı hərbi hücumlarını müşahidə edirik. Bu prosesin yekun məqsədi İranın nüvə proqramının tamamilə ləğv edilməsidir.

İlyas Hüseynov

“Hizbullah”ın mövcud sükutu taktiki səbəblərlə izah oluna bilər. İsrail ilə “Hizbullah” arasında döyüşlərin müəyyən mərhələsindən sonra Livan dövləti qruplaşmanın silahsızlaşdırılması öhdəliyini üzərinə götürdü. Bu kontekstdə “Hizbullah”ın hərbi imkanlarının məhdudlaşdırılması və beynəlxalq təzyiqlər qarşısında diqqət mərkəzindən çıxarılması məqsədəuyğun sayılır. Eyni zamanda bu sükut Tehranla koordinasiyalı şəkildə qəbul edilmiş bir gözləmə strategiyası ola bilər.

Yaxın Şərqdə İranın nəzarətində olan proksilər eyni anda aktivləşsə, bu, İsrailin təhlükəsizlik arxitekturası üçün çox böyük bir sınağa çevrilə bilər. Dəmir qüvvənin yəni İsrailin hava hücumundan müdafiə sisteminin bu halda sıradan çıxması ehtimalı hələ də aktualdır.

Müşahidə olunan situasiya onu göstərir ki, “Hizbullah”ın sükutu qətiyyən passivlik və ya zəiflik deyil, strateji gözləmə, həm də İranın baş qərargahı tərəfindən veriləcək əmri gözləmə vəziyyəti kimi də şərh oluna bilər. Belə görünür ki, Tehran bu mərhələdə regiondakı bütün proksilərini birdən işə salmaqla deyil, ölçülmüş şəkildə mərhələli eskalasiya planını üstün tutur”.