Bugünkü ABŞ-Avropa İttifaqı arasındakı gərginliyə görə əsas məsuliyyət Bayden-Blinken administrasiyasının yürüdüyü ultra-liberal və liberalo-faşist siyasətə aiddir. Eyni zamanda, Fransanın və digər Avropa ölkələrinin neokolonializm siyasətini davam etdirməsi, sivilizasiyalar arasında süni sərhədlər yaratmaq cəhdləri də bu vəziyyəti dərinləşdirir.
Digər tərəfdən, Ukraynanın taleyi onun iştirakı olmadan müzakirə edilir ki, bu da ölkənin narıncı inqilablar üçün bir poliqona çevrilməsinin nəticəsidir. Keçmişdə həmin çevrilişləri təşkil edən şəxslər, o cümlədən V. Nuland və K. Rays, hazırda rahat yaşayır, lakin müharibənin əzablarını Ukrayna xalqı çəkir.
Eyni zamanda, Azərbaycana qarşı müxtəlif ideoloji hücumlar da həyata keçirilirdi. Qərbin təsiri altında fəaliyyət göstərən bəzi qüvvələr Azərbaycan gəncləri arasında Qarabağa bağlılığı unutdurmağa çalışır, digər tərəfdən isə LQBT fəalları ənənəvi ailə modelini sarsıtmaq məqsədi güdürdü. Lakin Azərbaycanın güclü rəhbərliyi bu təhdidləri vaxtında görərək onların qarşısını alıb.
Ölkəmiz heç bir halda xarici dairələrin siyasi eksperimentləri və inqilabları üçün poliqona çevrilməyəcək. Azərbaycan müstəqil və qətiyyətli siyasət yürüdərək, həm tərəfdaş, həm də qeyri-dost ölkələrlə milli maraqlarını qorumağa qadirdir.
Siyasi şərhçi Azər Həsrət "Sherg.az"a deyib ki, Azərbaycan vaxtında tədbirlərini görməsəydi, biz də indi təlatümlər içərisində yaşayırdıq:
"Qonşu Gürcüstan, Ukrayna, Suriya və hətta digər ərəb ölkələri kimi Azərbaycanda da çox böyük fəlakətlər baş verə bilərdi. Eyni zamanda Qarabağı işğaldan azad etmiş olmayacaqdıq. Azərbaycan dövləti başda Prezident İlham Əliyev olmaqla bu cür təhlükələri vaxtında görüb dəyərləndirməyi bacardı. Nəticədə bu gün heç kim bizim daxili işlərimizə qarışa bilmir. Avropanın qarışdırılması, ABŞ-nin Trampa qədər yürütdüyü dövlət siyasətinin nəticəsində cəmiyyətlərin ənənəvi əxlaqi dəyərlərdən uzaqlaşdırılması, milli dövlətçiliyin baltalanmasına hər kəs şahid olurdu. Üstəlik, bu təzahürləri Azərbaycanda da zaman-zaman müşahidə edirdik. Lakin Azərbaycan toplumu mübarizə apardığı, qarşı gəldiyi üçün dövlət və xalq əl-ələ verərək problemin öhdəsindən gələ bildi. Təəssüflər olsun ki, qonşu Gürcüstanda uzun müddət həmin mənfi tendensiyalar at oynatdı. Həmçinin Ukraynada narıncı inqilaba qədərki və ondan sonrakı dövrdə xarici dairələr ayaq açıb yeridi. Nəticə isə göz önündədir".
Şərhçi vurğulayıb ki, indiki Avropa İttifaqı-ABŞ münasibətlərindəki gərginliklər öz yerində, bizim üçün önəmli olan öz dövlətimizim güvənliyini təmin etməkdir:
"Yəni Azərbaycan ənənəvi milli əxlaqi dəyərləri üzərində siyasətini yüksək şəkildə yürüdür. Ümumiyyətlə Qərbin və digər dairələrin təsiri altında olan qüvvələr Azərbaycana qarşı zərərli ideologiya sırımamalıdır, istəyənlərə də xalq və dövlət olaraq birlikdə cavab verməliyik".
