“Cənab Prezident İlham Əliyev Davosda ABŞ-nin Xristian Liderləri Konqresinin rəhbəri Coni Mur ilə keçirdiyi görüşdə qeyd etdi ki, ABŞ tərəfindən Azərbaycana qarşı qərəzli münasibət məhz Bayden-Blinken administrasiyası dövründə olub. Həqiqətən, Bayden Prezident seçildiyi andan açıq şəkildə Ermənistanın tərəfini tutub və hər fürsətdə Azərbaycana qarşı qərəzli siyasət aparıb”.

Bunu TNS-ə deputat Tural Gəncəliyev deyib.

Deputat qeyd edib ki, ABŞ təkcə Ermənistanı dəstəkləyən anti-Azərbaycan siyasəti həyata keçirməyib. ABŞ administrasiyasının maliyyələşdirdiyi, müxtəlif ölkələrdə xaos yaradan, cəmiyyətləri bir-birinə qarşı qoyan USAID, “Soros” Fondu tərəfindən QHT-lər vasitəsi ilə dünyanın ayrı-ayrı yerlərində Azərbaycana qarşı çirkin qarayaxma kampaniyası aparıb.

“Eyni zamanda dünya üzrə “insan hüquqları”ndan, “demokratik dəyərlər”dən başqalarına dərs keçməyə çalışan “Freedom House”, “Azadlıq” radiosu kimi qurumlar, ümumilikdə Vaşinqtondan aldıqları təlimatlar əsasında hərəkət edən QHT-lər Azərbaycana qarşı müxtəlif addımlar atıb. Cənab Prezidentin vurğuladığı kimi, münasibətlərimizin pozulmasında məhz Bayden və onun xarici siyasətinin “qurucusu” Blinken təqsirkar olub.

Bu administrasiyanın rəhbərliyində ölkəmizə qarşı “907-ci düzəliş”in bərpası həyata keçirilib. Bu, Bayden administrasiyasının ölkəni absurd prinsiplər əsasında idarə etdiyini göstərir. Çünki Ermənistanın Azərbaycana qarşı təcavüzü, işğalı nəticəsində əslində Ermənistana tətbiq edilməli olan “Azadlığa Dəstək Aktı”na “907-ci düzəliş” əksinə, Azərbaycana tətbiq edildi.

Sonradan müxtəlif prezidentlərin dövründə sənədin icrasının hər il müvəqqət dayandırılmasına nail olunub.

Ancaq Bayden-Blinken administrasiyası ermənipərəst siyasətini bir daha açıq şəkildə göstərərək, düzəlişi bərpa etdi.

Onlar tək Azərbaycan deyil, dünyanın müxtəlif bölgələrində, o cümlədən qonşumuz Gürcüstanda dəfələrlə təxribat törətməyə çalışdılar.

Bayden administrasiyası Ermənistanda bir forpost qurub, müvəffəqiyyət qazanıb. Hətta Bayden administrasiyasının getməsinə beş gün qalmış Ermənistan və ABŞ arasında imzalanmış strateji sənəd onların nə qədər çıxılmaz vəziyyətdə olduğunu bir daha göstərir.

Donald Tramp prezidentliyi dövründə xarici münasibətlərə yenidən nəzər yetirəcək”.