"Avropanın qaz təchizatının ciddi şəkildə şaxələndirilməsinə ehtiyac vardı".

Bu sözləri sabiq maliyyə naziri, professor Fikrət Yusifov "Cebheinfo.az"-a açıqlamasında deyib.

O bildirib ki, Rusiyanın Ukrayna üzərindən Avropaya qazın nəqlini dayandırması səbəbindən isə bu ehtiyac daha da böyüdü:

"Yeni ildən etibarən Rusiya tərəfindən qazın nəqlinin dayandırılması Avropadakı həyat üçün çox ciddi zərbədir. Onsuz da Rusiya "Şimal axını-1" xətti ilə nəql olunan qazın həcmini zaman-zaman azaldırdı. Xüsusilə də Almaniyaya ixrac olunan qazın həcmi azalırdı. Sonda bunu tamamilə dayandırdı".

Sabiq nazir diqqətə çatdırıb ki, biz isə "Cənub Qaz Dəhlizi" vasitəsilə Azərbaycan qazının Avropaya çatdırılması təmin edirik:

"Üstəlik, ölkəmizdən Avropaya tədarük olunan qazın həcmi isə artır. Ancaq müəyyən hədlər və məhdudiyyətlər olduğunu da nəzərə almaq lazımdır. Yəni biz müəyyən həddə qədər Avropaya qaz ixrac edə bilərik.

Lakin Azərbaycandan daha çox qazın təmin olunması üçün qonşu ölkələrin, xüsusilə də Türkmənistan qazının ölkəmiz üzərindən nəqli barəsində düşünmək olar. Hesab edirəm ki, bu, Türkmənistan üçün də çox sərfəli variantdır.

Əgər razılaşmalar əsasında bu mənbə hərəkətə gətirilərsə, o zaman Avropaya Azərbaycan üzərindən öz qazımızla yanaşı, tranzit formada digər qaz həcmlərinin də ixrac etmək imkanları yaranar".

Fikrət Yusifov vurğulayıb ki, bu da Avropanın qaz təchizatında müəyyən bir şaxələndirməni təmin edə bilər:

"Biz bu gün Avropaya qaz ixrac edirik. Ancaq ixracımızın həcmi Avropa bazarının qaza olan tələbatının çox kiçik bir hissəsidir. Avropa hər il 520-530 milyard kubmetr qaz istehlak edir. Yəni 15-20, yaxud 30 milyard kubmetr qaz ixrac etmək o ehtiyacın az hissəsini qarşılayar.

Lakin Avropanın cənub-şərqində yerləşən ölkələrin bəzilərinə qaz ixrac edirik. Daha çox qaz ixrac etmək və Rusiya qazını əvəzləmək üçün Azərbaycan üzərindən alternativ variantlardan istifadə etməyi düşünməliyik. Yeganə real mənbə qaz mənbəsi isə Türkmənistandır".