Laçın rayon sakini, Feyzullayev Arif Xəlil oğlu tərəfindən Hurriyyet.az saytının redaksiyasına şikayət məktubu daxil olub. Şikayətçinin məktubunu olduğu kimi dərc edirik:

“Mən, Feyzullayev Arif Xəlil oğlu, Laçın rayon sakiniyəm. Oğlum Feyzullayev Amil Arif oğlu Təhsil Nazirliyinin 10 saylı Mərkəzi Hesablaşma İdarəsinin Laçın Rayon Təhsil Sektorunda baş mühasibinin müavini işləyərkən iş yoldaşı ilə dövlətə 196 888 manat 51 qəpik ziyan vurmuşdur. Ziyanın 98 232 manat 46 qəpiyi Feyzillayev Amil tərəfindən vurulub.

Lənkəran Ağır Cinayətlər Məhkəməsinin 10 fevral 2023 -cü il tarixli, 1(099) 49/2022 nömrəli hökmü ilə vurulan ziyanın könüllü ödədiyi, bu şəxslərin ilk dəfə cinayət etdiyi nəzərə alınaraq, CM-nin 70-ci maddəsinə əsasən 3 il sınaq müddəti müəyyən etməklə şərti cəza tətbiq edilmişdir.

Lakin dövlət ittihamçısının Kassasiya şikayəti əsasında Şirvan Apellyasiya Məhkəməsinin 22 noyabr 2023-cü il tarixli qərarı ilə CM-nin 179.3.2 ci maddəsilə hər birinə 5 il 6 ay həbs cəzası verilmişdir. Biz verilən cəza ilə razılaşmayaraq, Ali Məhkəməyə kassasiya şikayəti vermişik.

Ali Məhkəmənin Cinayət Kollegiyasına verilən kassasiya şikayəti hakim Şahin Yusifovun sədrliyi ilə baxılmışdır. Məlum olmuşdur ki, vurulmuş ziyanın qarşılığında ödənilən 94.000 manatın 52.000 manatını Feyzullayev Amil ödəmişdir.

Hakim Şahin Yisifovun tələbi ilə, Amilin borcu 98232 manat 46 qəpik olduğu halda, mənim tərəfimdən 312 manat artıq olmaqla 98545 manatı tam ödənildi. Lakin Şahin Yusifov ödənilən pulun 4997 manatını oğurlamış (500 manatı iş yoldaşınındır), oğluma 3 il iş vermişdir.

Vəkil tərəfindən Ali Məhkəmənin Plenumuna verilən əlavə kassasiya şikayətinə, oğurladığı pulun üstü açılmasın deyə Şahin Yusifov tərəfindən mane olunmuşdur. Ali Məhkəmənin sədrinə oğurlanmış pulun bərpa olunması məqsədi ilə 5 dəfə ərizəylə müraciət etsəm də, şikayətimə baxılmamışdır. Sədrin qəbuluna düşmək üçün 3 dəfə teleqram vurmuş, 2 dəfə onlayn qaydada müraciət etmiş, 17 fevral 2025-ci ildə Ağcəbədidən Bakıya gedərək rəsmən qəbuluna yazılmışam. Sonda, 8 may 2025- ci ildə məni Şirvan şəhərinə dəvət edərək, sədrin qəbul edəcəyini bildirmişlər.

Lakin video görüntü ilə məni Ali Məhkəmənin şöbə müdiri Şahin Qəhrəmanov qəbul etmişdir. Yenə də müraciətimin heç bir nəticəsi olmadı.

Məsələ ilə bağlı Prezident İlham Əliyevdən və Birinci vitse-prezident Mehriban xanımdan kömək istəyirəm. Məhkəmələr biz vətəndaşların başına oyun açır. Şikayət edə biləcəyimiz yer yoxdur. Xahiş edirəm nəzərə alın, şikayətimi cavabsız qoymayın".