NN ŞEFİNİN İŞÇİLƏRİ NƏDƏN NAZİRƏ İKİNCİ DƏFƏ MƏKTUB YAZASI OLDULAR?
DİA.AZ: - İş yoldaşları adından və tapşırığı ilə, Azərbaycan dəmir yolu Biləcəri lokomotiv deposunun çilingəri A.Ə.Əliosmanov nəqliyyat naziri Ziya Məmmədova açıq məktub ünvanlayıb. DİA.AZ olaraq həmin məktubu olduğu kimi diqqətinizə təqdim edirik. Məktubda deyilir:
“Yarım il əvvəl bir qrup dəmiryolçu internet vasitəsi ilə (www.contact.az, 30.08.12. və 05.10.12. tarixli “Прошу слова” və “Deməyə sözüm var” rubrikalarının arxivi) bərbad vəziyyətə düşmüş Azərbaycan dəmir yolunun bərpası üçün kömək xahişi ilə Azərbaycan Respublikasının Prezidenti cənab İlham Əliyevə iki dəfə açıq məktubla müraciət etmişdir.
Müraciətlərimizin heç birinə cavab gəlmədi, prezident bizi eşitmədi. Heç bir nəticə də olmadı: dəmir yolunun və dəmiryolçuların durumunda heç olmasa hansısa yaxşı dəyişikliklərə biz nail ola bilməmişik. Doğrusu, tam əksinə oldu – vəziyyət keçən ilkindən də ağırlaşdı. Yeganə nail olduğumuz o olub ki, Azərbaycan dəmir yolunun rəhbərliyi tam heyyətlə bizə qarşı səfərbərlik elan edib. Yəqin ki, yolun hazırki durumu onları nədənsə qane edir.
Nailiyyətimiz o da olub ki, yol rəisi, cənab Əsgərov, əvvəlki müzəffər raportlardan fərqli olaraq, Azərbaycanda dəmiryol nəqliyatının acınacaqlı vəziyyətini etiraf etdi və jurnalistlərin qarşısında 2012-ci ilin oktyabr ayının 13-də Azərbaycan dəmiryolçularının gününə həsr olunmuş təntənəli tədbirdə iştirak edən dəmiryolçulara növbəti dəfə vəd verib ki, : “Azərbaycanda dəmiryolçuların əmək haqqısı imkan daxilində mərhələ-mərhələ artırılacaq”.
Deyirlər ki, siz də bu tədbirdə iştirak etmisiz və bundan sonra da gücünüz və imkanınız daxilində dəmir yoluna və dəmiryolçulara daha da çox kömək edəcəyinizə söz verib, 2012-ci ilin sonuna kimi maaşların artması və mənzil qeydiyyatında olan dəmiryolçular üçün 150 mənzilin ayırılacağı xəbərləri ilə hamını sevindirdiniz. 2012-ci il arxada qaldı, 2013-ci ilin birinci rübü yekunlaşmaq üzrədir.
Acı təcrübəmizə əsaslanaraq və hec də bu sualla xətrinizə dəymək istəməyərək, soruşmaq istərdik: cənab nazir, söz verdiyiniz, maaş və mənzil vədlər ilə bağlı biz hələ də ümidli olaq, ya da biz həmişəki kimi aldanmış qalacağıq? Hər ilki inflyasiyaya və qiymət artımına, dəmir yol və nəqliyyat nazirliyi rəhbərliyinin hər ilki vədlərinə baxmayaraq, on ildən artıqdır ki, dəmiryolçuların əmək haqqısi artmır. Həmin acı təcrübəmiz bizə xatırladır ki, 2010-ci ilin əvvəlində siz dəmiryolçulara mənzil orderlərini təqdim edilməsinə dair tədbirdə təntənəli şəkildə söz vermisiz – bundan sonra mənzillər hər rüb paylanacaq. O vaxtı bu sözləriniz dəmiryolçuların qəlbinə böyük bir ümid salmışdır: on illərlə həll olunmayan və ağırlığı ilə boğan onların mənzil problemləri nəhayət ki, həll olunacaq, - sonradan acı ümüdsizliklə nəticələndi. Bundan sonra da hər ildə bir neçə dəfə mənzil vədləri verilsə də, o vaxtdan bir dənə də olsun mənzil verilməyib.
Bir halda ki, söhbət dəmiryolçuların mənzil problemlərindən düşdu, cənab nazir, diqqətinizi Azərbaycan Dəmiryolçularının Müstəqil Həmkarlar İttifaqı Respublika Komitəsinə həvalə olunmuş, - verilən mənzillərə ehtiyacı olanların ədalətli qeydiyyatı və verilmə növbəliliyi məsələlərinə yönəltmək istərdik. Çox təəssüf ki, dəmir yol müəssisələrinin həmkarlar komitələri və onların, dəmir yol idarəsində rahatlıqla əyləşən, mərkəzi rəhbərliyi bu məsələlərə çox özünəməxsus şəkildə yanaşırlar: tam məxfilik və qeyri müəyyənlik şəraitdə bacardıqları qədər aşkarlığın və şəffaflığın qarşısını almaq.
Özü də, hər həmkarlar komitəsinin öz meyyarı: öz normativ aktları, öz qanunları, öz dəlil-sübutları vardır, - yaşayış sahələrinə ehtiyac olanların qeydiyyatı üçün, Qanunvericiliklə nəzərdə tutulmuş, vahid normativ-hüquqi bazası yoxdur. Razılaşın ki, belə şəraitdə, özü də yaşayış sahələrinin paylaşdırılmasına nəzarət edən insanların elementar hüquqşünaslıq bilgilərə malik olmadığı halda, Qanunlara hörmət gözləmək də artıq olmur.
Azərbaycan dəmir yolunda təkzibedilməz korrupsiya faktları ilə bağlı Azərbaycan Prezidentinə ünvanlanmış cavabsız və nəticəsiz müraclətlərimizə qayıdaraq, həmin müraciətlərdə verilən sualların cavabını sizdən almaqa ümid edirik: nə vaxt Azərbaycan dəmir yolunda real, - istehsalat və sosial müsbət dəyişikliklər, nəhayət ki, başlayacaq?
Dəmir yolu saytının (www.addy.gov.az) baş səhifəsində təsvir olunmuş və bu müraciətin əvvəlində yerləşdirilmiş, qürur və nüfuz hissləri oyadan, - belə Azərbaycan Dəmir Yolunu bizim nəticələrimiz reallıqda görə biləcəklərmi? Nəzərə alsaq ki, dövlət başçısına kütləvi informasiya vasitələri ilə göndərilmiş bizim iki açıq müraciətlərimizdən sonra da, dəmir yolunun idarəetmə texnoloqiya və üsullarında heç bir dəyişiklik olmayıb, onda Azərbaycanın dövlətçiliyinə dağıdıcı zərbə vuran və ölkəni, böyük fəlakətlərlə nəticələnən, xaosa sürükləyən – dəhşətli bir həqiqətlər birmənalı şəkildə üzə çıxır:
1. Dövlət başçısı öz nazirlərinə nəzarət və işlərinə təsir göstərmək səlahiyyətlərinə malik deyildir
2. Çoxsaylı Dövlət Proqlamlarına və inkişafı üçün böyük maliyə vəsaitlərinin ayırılmasına baxmayaraq, ölkənin iqtisadi və ictimai həyatında mühüm strateji funksiyasını yerinə yetirən, Azərbaycan dəmir yolu, - korrupsiyanın belə səviyyəsi və idarəetmənin belə üsulları ilə indiki vəziyyətdən heç vaxt çıxa bilməyəcək və bu vəziyyət daha da pisləşəcək.
Bugünkü Azərbaycanın reallıqlarını tam dərk edərək və dövlət başçısına həqiqəti çatdıran dəmiryolçulara qarşı mənəvi və maddi pressinqin səviyyəsini yadına salaraq, bu müraciətin müəllifi öz həmdərdlərini və onların ailələrini yeni və tamamilə real təhlükələrə salmaq istəmədi. Müraciətə imza atmaq istəyənlərin sayı çox olsa da, altında ancaq bir adamın qolu var”.
Qarşı tərəfin də mövqeyini işıqlandırmağa hazırıq...
