Ucar rayonu, Alpout kənd sakini Abbasov İbrahim Qüdrət oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, Nardaranda yerləşən "Sea Breaze" ərazisində - “Dəmir Yumruq” şirkətində çalışıb sonradan qərəzli olaraq texnikası yandırılıb:

“Mən, Abbasov İbrahim Qüdrət oğlu, yazaraq başıma açılan haqsızlığı diqqətinizə çatdırmaq istəyirəm.

Bildirim ki, oğluma məxsus “Bobcat-Teleskop” yükləyici texnika ilə Nardaranda, "Sea Breaze" ərazisində işə dəvət aldım. 2 ay orada işlədim. Aylıq əmək haqqımı gecikdirdikləri üçün söz-söhbətimiz olurdu. 2-ci ay da eyni qaydada əmək haqqımı gecikdirdilər. Bu dəfə şirkətin səlahiyyətli nümayəndələrindən olan Turqut adlı şəxs mənə "texnikanı ərazidən uzaqlaşdır", - dedi. "Əmək haqqımı verin, texnikanı çıxarım", - dedim.

Daha sonra Turqut 2 nəfər göndərib, onların vasitəsilə mənə bildirdi ki, qalım işimi görüm, 2 günə əmək haqqımı alacam.

2 gün keçdi, yenə məni aldatdılar, pulumu vermədilər. 2024-cü il, may ayının 13-də isə texnikamı yandırdılar. Hazırda isə şirkət mənə dəymiş ziyanı qarşılamaq istəmir.

Səlahiyyətli şəxslərdən xahiş edirəm ki, məsələ ilə bağlı araşdırma aparılsın və mənə dəyən zərər ödənilsin".

Şikayətçinin iddiası ilə əlaqədar “Dəmir Yumruq” şirkətinin səlahiyyətli nümayəndəsi olan Turqut bəylə əlaqə saxladıq:

"Əvvəla qeyd edim ki, texnikanın yanmağına səbəb Abbasov İbrahim Qüdrət oğlunun özü olub. Belə ki, şəxs məsuliyyətsizlik edib, qanunsuz yollarla tok xətləri çəkib, texnikaya ambians işıqlar qoşdurduğu üçün yanmışdır. Əslində, şirkət ondan şikayətçi olmalı idi, sadəcə yazığımız gəldi. Texnika yanan zaman binaya yaxın olub. Əgər bina zərər görsəydi, vətəndaş heç o ödənişi edə bilməyəcəkdi.

Fövqəladə Hallar Nazirliyi texnikanın yanmasına görə baxış keçirib və sənəddə yazıblar ki, texnikanın yanmasına akummulyatorda yaranmış qısaqapanma səbəb olub.

Texnikanın bütün ödənişləri ödənilib. Əlimizdə qaimələr var. Buna baxmayaraq, adam hətta mənim özümə belə, şər-böhtan atmışdı. Halbuki, bir daha qeyd edirəm ki, texnikanın yanmasına səbəb şəxsin özünün məsuliyyətsizliyi olub".