Naxçıvanda FHN əməkdaşları ticarət obyektlərinin hər birindən 100 manat rüşvət verməyi tələb edirlər. Bu tələbə əməl etməyənlərin müxtəlif bəhanələrlə cərimələndiyi, obyektləri bağlamaqla hədələndiyi bildirilir. Bu haqda “Gündəlik Naxçıvan”a bir qrup sahibkar məlumat verib.

Sahibkarlar bildirirlər ki, bir müddət öncə FHN avtomatik yanğın xəbərverici siqnalizasiya qurğusu ilə təchiz etmək adı ilə onlardan 500 manat rüşvət alıb. İndi isə, o vaxt alınan pulun az olduğunu əsas gətirib, sahibkarlardan əlavə 100 manat istənilir.

Sahibkarlardan Sabir Əliyev deyir ki, rüşvəti toplayan FHN əməkdaşları tapşırığın yuxarıdan gəldiyini bildirirlər:

“Bir neçə ay öncə gəlib 500 manat aldılar, dəyəri 50-60 manat olan cihaz quraşdırdılar. Heç, işləmir də. Yanğın olsa, bu cihazın heç bir xeyri dəyməyəcək. İndi də deyirlər ki, o vaxt verdiyiniz pul az olub, 100 manat da əlavə verməlisiniz. Onsuz da ez-tez gəlib, müxtəlif bəhanələrlə 40-50 manat pul alıb gedirlər. İndi də belə edirlər. Onsuz da iş zəifdir, qazancımız yoxdur. Biz ancaq bu məmurlara işləyirik. Şikayət də edə bilmirik. Şikayət edəndə gəlib bir bəhanə qoyub daha yuxarı mələğdə cərmələyirlər. Bir sözlə, rüşvətxor FHN əməkdaşları bizə işləməyə imkan vermirlər.”

Digər sahibkar Sahib Hüseynov da eyni cihaza görə yenidən 100 manat pul yığmalmasından şikayət edir:

“Onsuz da vəziyyətimiz ağırdır. FHN əməkdaşlarına, sahə müvəkkilinə, vergi işçilərinə hər ay pul veririk. Bir müddət əvvəl siqnalizasiya qurşdırmaq üçün 500 manat aldılar. Halbuki ona heç bir ehtiyac yox idi. Onsuz da işləmir çünki, mərkəzə bağlamayıblar. Görüntü üçün qoyublar. İndi də yenidən gəlib deyirlər ki, 100 manat verəcəksən. 20 kvadırat dükandır. Hər ay 1000 manat kirayə verirəm.Alış-veriş də yoxdur. Artıq dükanı bağlamaq məcburiyyətindəyəm. İşlədiyimiz özümüzəq qalmır. Hər gələn pul istəyir, bizimki isə nökərçilik olur.”