“Bəhram Bağırzadə nə vaxtdan yazıçı olub ki, ondan kitab alırlar? O nə yazıb? Hansı kitabları yazıb? Mən onu yazıçı hesab etmirəm. O aktyordur. Yaxşı da aktyordur. Mənə də çox adam deyir ki, bəlkə atan haqda nəsə yazasan, xatirələr dərc edəsən? Deyirəm ki, mənlik deyil. Yazsaydım bu neçə ili yazardım da. Atamın kitablarını qardaşım satırdı. Gedib dayanırdı Nərimanovun heykəlinin qabağında, taksi sürücülərinə kitabları satırdı və qazandığı pulları da cibinə qoyurdu. Hər yerdə deyirdi ki, “bacım ölüb, tək mənəm”. Bütün yardımları, köməkləri o alırdı. Mən atamda pul görməmişəm. Sadəcə olaraq pensiyama 40 manat əlavə pul ödəyirdilər”

Bunu Moderator.az-a açıqlamasında Əliağa Vahidin qızı Firəngiz Əliağa Vahid qızı deyib. O daha sonra əlavə edib:

“O gün atam haqda “Ötən günlər” verilişini göstərirdilər. Mən telefonda baxdım. Verilişdə olanlar deyirdi ki, Vahid deyib ki, böyük Füzulinin yadigarı özüməm. O kişi həqiqətən də özünü Füzuli ilə bir tuturdu. Xəqanidən, Seyid Əzim Şirvanidən tərcümələr edirdi. Fars dilində də bilirdi. Atam xəstə idi, astmadan əziyyət çəkirdi. İndiki zamanda olsaydı müalicə ala bilərdi. Bizə iki otaq ev aldı, adımıza kassaya 500 manat qoydu. Əlindən nə gəlirdisə sağlığında bizim üçün etdi” deyə o bildirib.
O daha sonra Yazıçılar Birliyinin sədri Anarın onlarla maraqlanmadığını bildirib:

“Yazıçı Anar bir dəfə də olsun bizimlə maraqlanmayıb. O boyda adamdır, hərhalda qapı-qapı düşüb bizimlə maraqlanası da deyil. Amma mən də Əliağa Vahidin qızıyam. Bir dəfə bizə köməyi dəyib. Anamın o vaxt mikrorayonda bir otaqlı evi var idi. Atam dünyasını dəyişəndən sonra anam müraciət etdi, Yazıçılar Birliyi bu evi ona verdi. Anam rəhmətə gedəndən sonra Anarın yanına gedib müvəqqəti o evdə yaşamağım üçün xahiş etdim. Qardaşımın oğlu da ora qeydiyyatda idi. Anar məni həmin evə qeydiyyata saldı. Sonra qardaşım arvadı eşitdi bu məsələni, həmin evi əlimdən aldı. Guya mənə başqa ev verəcəkdilər” deyə o bildirib.