“Aktyorlar bizdə həmişə çox az qonorar alıb. “Nəsimi” filminə görə mən 1500 azn, “Babək” filminə 8 aya 5 min manat qonorar almışam. Aya böləndə 500 manat ancaq düşür. Bununla dolanasan, evin saxlayasan, yoxsa pul yığasan? Əlbəttə ki, bu mümkün deyil. İndi kino da çəkilmir, bahalıq baş alıb gedir. Ulu Öndər Heydər Əliyev incəsənət adamları üçün o vaxt təqaüd fikirləşdi. Bu o vaxt təkcə bizdə idi, sonra Rusiyada da, Sankt-Peterburqda da xalq artistlərinin maaşına 30 min rubl əlavə etdilər. Bu dolanmaq üçün çox yaxşı idi”
Bunu Moderator.az-a açıqlamasında xalq artisti Rasim Balayev deyib. O daha sonra bildirib ki, yazıçı Anar iki ssenari yazsa da, hələ də ona bu filmləri ərsəyə gətirmək üçün şərait yaratmırlar:“Anar iki ssenari yazıb. Birindən xəbərim var, birindən yox. Mənə özü dedi. Onun stili bir az fərqlidir. Anarın ssenari müəllifliyini etdiyi bir neçə filmdə baş rolları oynamışam. Bunlara misal olaraq “Dədə Qorqud”, “Sübhün səfiri”, “Cəlil Məmmədquluzadə”, “Cavid ömrü” və s. ekran işlərini göstərə bilərəm. Məsələn, “Sübhün səfiri” filminə baxanda sən sabah gedib asanlıqla dərsdə Mirzə Fətəli Axundovun həyatından danışa bilərsən. Anar Cəfər Cabbarlı haqda da ssenari yazıb, amma ortalığa çıxarmırlar. Daha doğrusu onun qonorarını da veriblər, ssenarini qəbul ediblər, amma istehsalata buraxmayıblar. Qabaq belə idi ki, sənin ssenarini qəbul edəndə də pul verirdilər, sonra çəkilib istehsalata gedəndə də əlavə pul verirdilər. Ümid edirəm ki, tezliklə Anarın filmləri çəkilər” deyə sənətkar bildirib.
