Son dövrlər bəzi gənc müğənnilər televiziya verilişlərinə qatılmaq üçün onlardan pul tələb edildiyini bildirirlər. İddialara görə, efirlərə çıxmaq istəyən əksər ifaçılar bu problemlə üzləşirlər.

Belə təcrübə yerli kanallarda həqiqətən varmı?

Globalinfo.az-a danışan prodüsser Tarix Əliyev (Tolik) deyib ki, heç bir aparıcı müğənnidən pul tələb etmir.

“İfaçılar şəxsi reklamı üçün televiziyanın müvafiq şöbəsinə ödəniş edir. Pul verənlərin çoxu tanınmaq istəyənlərdir. Bəzən elə adamlar olur ki, pul təklif etsələr də, efirə dəvət etmirəm. Bu gün hansısa müğənni verilişimə çıxıb gündəmə gəlmək üçün kiməsə söz atacaqsa, lazım deyil. Xalq artisti Arif Babayev efirlərə çıxmır, amma bir dəfə zəng edib tələbələrini dəvət etməyi təklif etdi. Dedim, baş üstə! Mənsum İbrahimov, Gülyaz Məmmədova, Təyyar Bayramov, Ehtiram Hüseynov, Babək Niftəliyev də tələbələri ilə gəlib. Mən “Toylar kralı” mahnı yarışması keçirmişəm. Orda heç kimdən bir manat da almamışdım. Amma elə xanım müğənnilər var ki, özünü açıb qoyub ortalığa və efirə pulsuz gəlmək istəyir”.

Tolik tanınan gənc ifaçıların efirlərə pulsuz dəvət aldığını da vurğulayıb:

“Televiziyaların pul istədiyini deyən gənclərə sual vermək lazımdır ki, Üzeyir Mehdizadə, Damla, Hiss ödəniş edir? Görünür, həmin müğənnilər televiziyalar üçün maraqlı deyil. Kanallar da özəl olduqlarına görə seçim öz ixtiyarlarındadır. Verilişimə bir dəfə gələni 10 dəfə çağırmaq məcburiyyətində deyiləm. “Xalq ulduzuyam”, deyirlər. Amma bu, SMS üzərində qurulan yarışdır. Xalqın ulduzu Könül Xasıyeva, Alim Qasımov, Niyaməddin Musayev və onların səviyyəsində olan ifaçılardır. Səs alıb ulduz olanlar yox!”.

Aparıcı efir qiymətlərinin fərqli olduğunu deyib:

“Ödənişlər kanaldan kanala dəyişir. Bəzi verilişlər min manat, bəziləri 2 min manat alırlar. 50-300 manat aralığında pul istəyənlər də olur. Həmin məbləğdən aparıcıya çatmır. Biz maaşımızdan əlavə, sponsorlardan faiz qazanırıq”.