Ağdaş rayonu, Yenicə kənd sakini Məhərrəmova Kəmalə Təhvil qızı tərəfindən Hurriyyet.az saytının redaksiyasına şikayət məktubu daxil olub. Şikayətçi Əmək və Əhalinin Sosial Müdafiəsi Nazirliyinin tabeliyində olan Tibbi-Sosial Ekspert Komissiyasından narazılığını bildirir:

“Mən, Məhərrəmova Kəmalə Təhvil qızı, yazarq bildirirəm ki, həyat yoldaşım Məhərrəmov Seyfəddin Qəhrəman oğlu 1-ci Vətən müharibəsinin iştirakçısı olub. Ağır xəstədir. Dəfələrlə yaddaş pozğunluğu yaranıb və intihara cəh edib. Xəstəliyinin ağırlığı barəsində sənədlərdə də yazılıb. Lakin dəfələrlə nazirlik əlillik üçün müraciətimizə imtina cavabı verir.

Maddi imkanımız olmadığı üçün həyat yoldaşımı müalicə etdirə bilmirik. Bu səbəbdən, vəziyyəti ağırlaşır.

Məsələ ilə bağlı məhkəməyə də müraciət etmişəm. 2024-cü ildə sənədlərimiz yenidən göndərdik ki, bəlkə insafa gəlib müalicə üçün əlillik verələr, yenə imtina verdilər.

Həyat yoldaşımın diaqnozunda xəstəlikləri göstərilib. Qıcolma və intihara cəhd. Dövlət tərəfindən ona qayğı göstərilmirsə, mən o dərmanları necə alım?!"

Məsələ ilə bağlı Dövlət Tibbi-Sosial Ekspertiza və Reabilitasiya Agentliyinin mətbuat xidmətindən bildirdilər ki, Ağdaş rayon sakini 1975-ci il təvəllüdlü Məhərrəmov Seyfəddin Qəhrəman oğlu əlilliyinin qiymətləndirilməsi ilə bağlı tibb müəssisəsi tərəfindən rəsmiləşdirilən forma-88 göndərişi əsasında 05.12.2024-cü il tarixdə Dövlət Tibbi-Sosial Ekspertiza və Reabilitasiya Agentliyində əyani müayinə edilib:

"Müayinə zamanı vətəndaşın hazırki sağlamlıq vəziyyətinin əlillik təyinatına əsas vermədiyi müəyyən edilib. Bu səbəbdən, müvafiq qanunvericiliyə uyğun olaraq, diaqnozun əlillik əlaməti təyin etməməsi barədə qərar qəbul edilib.

Hazırda isə Seyfəddin Məhərrəmovun əlilliyinin qiymətləndirilməsi ilə bağlı tibb müəssisəsi tərəfindən heç bir yeni göndəriş rəsmiləşdirilməyib. Tibb müəssisəsi tərəfindən şəxslə bağlı yeni forma-88 sənədi rəsmiləşdirildikdən sonra onun əlilliyi qanunvericiliyə uyğun olaraq təkrar qiymətləndirilə bilər".