Daha bir tanınmış cərrah əməliyyatını açıq şəkildə PAYLAŞDI

Son vaxtlar bəzi həkimlərin, xüsusilə də cərrahların əməliyyat proseslərini sosial şəbəkələrdə paylaşması cəmiyyət arasında geniş müzakirələrə səbəb olub. Bəziləri bunu tibbin şəffaflaşması və maarifləndirici addım kimi dəyərləndirsə də, digərləri bu cür paylaşımların pasiyent hüquqlarını və tibbi etikanı poza biləcəyini düşünür. Mütəxəssislər isə bildirirlər ki, əməliyyat görüntülərinin ictimaiyyətlə paylaşılması yalnız xəstənin yazılı razılığı və etik çərçivə daxilində mümkündür.

Bizim.Media xəbər verir ki, bu cür hallardan biri də Respublika Klinik Xəstəxanasının ümumi cərrahı, eləcə də Davinci International Hospitalın həkimi Zahid Zahidovun həssas əməliyyat görüntülərini sosial şəbəkə hesabında açıq şəkildə yayımlaması ilə bağlıdır.

Sözügedən paylaşım ictimaiyyətdə narahatlıq doğurub.

Məsələ ilə bağlı əvvəlcə cərrahın özü ilə əlaqə saxladıq. O, Bizim.Media-ya açıqlamasında etdiyi paylaşımla bağlı özünə belə haqq qazandırıb:

“Canlı yayım açmıram, sadəcə əməliyyatları paylaşıram. Paylaşımlarımla bağlı Səhiyyə Nazirliyi tərəfindən heç bir qadağa qoyulmayıb. O videoların heç birində qanunazidd görüntülər yoxdur. Əməliyyatların gedişidir və həkimlər də, tələbələr də o əməliyyatlara baxıb bəhrələnirlər. Kimsə, konkret olaraq mənə nəsə irad bildirməyib. Canlı açmaq olmaz sadəcə”, - deyə Zahid Zahidov bildirib.

Səhiyyə Nazirliyinin Analitik Ekspertiza Mərkəzindən isə məsələnin nəzarətə götürüləcəyi və araşdırılacağı bildirilib:

“Hadisə araşdırılacaq və nəticəsi barədə ictimaiyyətə ətraflı məlumat veriləcək”, - deyə qurumdan bildirilib.

Azərbaycan qanunvericiliyinə və Səhiyyə Nazirliyinin etik qaydalarına görə, pasiyentin razılığı olmadan onun tibbi məlumatlarının və görüntülərinin yayılması qanun pozuntusu sayılır və intizam və ya hüquqi məsuliyyətə səbəb ola bilər.

Paylaşım üçün xüsusi şərtlər var ki, onlardan ən əsası xəstənin yazılı razılığı olmalıdır. Belə ki, əməliyyat prosesi və ya nəticələri xəstənin kimliyini göstərməsə belə, hüquqi cəhətdən bu görüntülərin paylaşılması üçün açıq və yazılı razılıq tələb olunur.

Bundan əlavə məxfiliyə riayət edilməlidir. Yəni, pasiyentin üzü, adı, soyadı, hətta bədənindəki fərqləndirici izlər belə kadra düşürsə, bu artıq məxfi tibbi informasiya sayılır və yayılması qanunsuzdur. Həmçinin etik normalar pozulmamalıdır. Həkim əməliyyatı şouya çevirməməli, insan bədəni üzərində aparılan tibbi müdaxilə hörmət və peşəkarlıq çərçivəsində təqdim edilməlidir.