"Ermənistan artıq regionda konstruktiv rola keçməyə məcburdur"

. 

Ermənistan Baş naziri Nikol Paşinyan ölkəyə yeni konstitusiya lazım olduğunu bir daha vurğulayıb.

Paşinyanın konstitusiyanı yeniləmək istəməsinin əsas səbəbi Zəngəzur dəhlizi və Azərbaycanla sülh məsələsi ola bilərmi?

Mövzu ilə bağlı Redaktor.az-a açıqlamasında politoloq Tural İsmayılov bildirdi ki, Paşinyan bu dəyişikliyin vacibliyini "müasir reallığı əks etdirən" zərurət kimi təqdim etməklə çalışır, lakin əslində bu, Ermənistanın 30 il ərzində irredentist siyasətin iflasını qəbul etmək məcburiyyətindən doğur:

"Ermənistan rəhbərliyinin konstitusiya dəyişiklik planı əslində regional güc balansının köklü dəyişməsini etiraf etmək cəhdidir. Paşinyan mövcud konstitusiyaya düzəlişlərdən deyil, yeni konstitusiyanın qəbulundan danışır və böyük ehtimalla parlament seçkilərindən əvvəl bu dəyişiklikləri həyata keçirməyə çalışır. Bu, Ermənistanın 1990-cı illərlərdən bəri apardığı territorial iddialar siyasətinin artıq dayanılmaz olduğunu göstərir.
Ermənistan hakimiyyəti onilliklər ərzində xalqını "Böyük Ermənistan" fantaziyası ilə aldatmış, reallığı inkar etmiş və regional əməkdaşlığa qarşı müqavimət göstərmişdir. İndi isə Paşinyan məcburiyyətdən "müasir reallığı qəbul etmək" barədə danışır, çünki Ermənistan artıq keçmiş aqressiv siyasətini davam etdirə bilmir.
Paşinyanın "bugünkü Ermənistanın mövcud reallığını ifadə etməlidir" açıqlaması əslində ölkənin regional təcridindən çıxış yolu axtarması deməkdir. Ermənistan onilliklər ərzində Azərbaycana qarşı işğalçılıq siyasəti aparmış, beynəlxalq hüququ tapdalamış və regionu sabitləşdirməyə mane olmuşdur".

Politoloq qeyd etdi ki, Zəngəzur dəhlizi məsələsi Ermənistan üçün xüsusilə ağrılıdır, çünki bu, ölkənin əsl geosiyasi mövqeyini - regionda tranzit ölkə olmaq statusunu - qəbul etmək deməkdir:

"Ermənistan rəhbərliyi əvvəllər özünü "irredentist güc" kimi təqdim etməyə çalışırdı, indi isə praktik məsələlərlə məşğul olmağa məcburdur.
Konstitusiya dəyişiklik planı həm də Ermənistanın daxili siyasi böhranının təzahürüdür. Paşinyan hakimiyyəti xalqın qarşısında uzun müddət sürdürdüyü revanşist ritorika üçün cavab verməli olur və reallığa uyğunlaşmaq məcburiyyətində qalır.
2027-ci ildə yeni Konstitusiyanın qəbul edilməsi üçün referendum keçirməyi planlaşdırılır - bu, Ermənistanın keçmiş siyasətinin tam şəkildə dəyişdirilməsi prosesinin rəsmi etirafıdır. Ermənistan artıq regionda konstruktiv rola keçməyə məcburdur".

T.İsmayılovun sözlərinə görə, Paşinyanın konstitusiya dəyişiklik planı regional sülh üçün mütləq zərurəti nəzərdə tutur, lakin bu proses Ermənistanın çoxillik təhrikkarlığının nəticəsi olaraq çox gec başlanır.

"Regionda sabitlik ancaq Ermənistanın tam şəkildə keçmiş aqressiv siyasətindən əl çəkməsi və reallığı qəbul etməsi ilə mümkün olacaq.
Bu konstitusiya dəyişiklik planı əslində Ermənistanın regionda apardığı zərərli siyasətin son nöqtəsi olmalıdır və ölkənin gələcəyə konstruktiv baxışla yanaşması üçün zəruri addımdır", - deyə o vurğuladı.