ABŞ-ın Azərbaycana marağı təbiidir:
Dünən, 14:57
Bu gün Azərbaycan-Birləşmiş Ştatlar dostluq əlaqələrini və tərəfdaşlığını keyfiyyətcə yeni səviyyəyə yüksəltmək üçün yaxşı imkanlar vardır.
Bu barədə Prezident İlham Əliyevin Amerika Birləşmiş Ştatlarının Prezidenti Donald Trampa təbrik məktubunda bildirilib.
“Hesab edirəm ki, iqtisadi-ticari, energetika, nəqliyyat, sənaye, aviasiya, yüksək texnologiyalar, sərmayə qoyuluşu və digər mühüm sahələrdə qarşılıqlı faydalı əməkdaşlığımızın inkişafı üçün böyük potensial mövcuddur”, - məktubda vurğulanıb.
Politoloq Zeynal Əmrəliyev Sherg.az-a söyləyib ki, ABŞ və Azərbaycan arasında əlaqələrin inkişafı üçün geniş imkanlar mövcuddur:"Xüsusilə Donald Trampın yenidən Prezident seçilməsi iki ölkə arasındakı münasibətlərin canlandırılması baxımından əhəmiyyətli addımların atılmasına şərait yarada bilər. Hazırda ABŞ-ın bölgəyə xüsusi marağı var. Trampın əsas məqsədlərindən biri logistika və ticarət əlaqələrinin inkişaf etdirilməsi, bu sahədə ABŞ-ın rolunun gücləndirilməsidir. Bu kontekstdə Azərbaycan ABŞ üçün olduqca cəlbedici tərəfdaş hesab olunur. Azərbaycanın Şərq-Qərb nəqliyyat dəhlizinin mərkəzində yerləşməsi – xüsusilə Çinlə Avropa arasında tranzit yüklərin daşınmasında əsas ölkələrdən biri kimi çıxış etməsi – onun strateji mövqeyini daha da gücləndirir. Eyni zamanda Azərbaycan Mərkəzi Asiyaya açılan qapıdır və Türk dünyasında getdikcə artan təsir imkanlarına malikdir. Qarabağda keçirilən tədbirdə Mərkəzi Asiya ölkələrinin liderlərinin iştirakı da bölgədə formalaşan yeni geosiyasi şəraitin və bu prosesdə Azərbaycanın aparıcı rolunun göstəricisidir. Bütün bu faktorlar göstərir ki, Azərbaycan yüksək potensiala malik bir ölkədir. Enerji infrastrukturu müasir tələblərə cavab verir, logistika imkanları isə sürətlə inkişaf edir. Azərbaycanın enerji resurslarından effektiv istifadə etməsi və bu sahədə müxtəlif ölkələrlə əməkdaşlıq etməsi onu Şərqi Avropanın enerji təhlükəsizliyinin əsas təminatçılarından birinə çevirib.
Bu mənzərə fonunda ABŞ-ın Azərbaycana marağı təbii görünür".
Analitik vurğulayıb ki, uzun müddət iki ölkə arasındakı münasibətlərdə gərginlik müşahidə olunub:
"Xüsusilə Bayden administrasiyası dövründə ermənistanpərəst dairələrin təsiri nəticəsində Azərbaycanla əlaqələrdə soyuqluq yaranmışdı. Lakin Donald Trampın hakimiyyətə qayıtması fonunda münasibətlərin yenidən istiləşməsi üçün əlverişli şərait formalaşıb. Hətta yaxın gələcəkdə iki ölkə arasında yüksək səviyyəli görüşlərin keçirilməsi gündəmə gələ bilər".
Geri qayıt